: बारामा प्रहरीले १३९ किलो लागुऔषध गाँजा बरामद गरेको छ। जिल्ला प्रहरी कार्यालय बाराका अनुसार भदौ २० गते राति करिब साढे १० बजेतिर पचरौता नगरपालिका–७ स्थित बैनीली चोकबाट करिब ३०० मिटर पूर्व धान खेतमा गस्तीमा खटिएको प्रहरी टोलीले गाँजा बरामद गरेको हो।
प्रहरीका अनुसार धान खेतको आलीबाट ९ जना मानिसहरू झोलाजस्तो वस्तु बोकेर आउँदै गरेको अवस्थामा गस्ती टोलीले रोक्न खोज्दा उनीहरूले बोकेका पोका खेतमै फालेर फरार भएका थिए।
प्रहरीले ती पोका जाँच गर्दा गाँजा फेला परेको हो। ९ वटा पोकामा रहेको गाँजा तौल गर्दा कुल तौल १५५ किलो र बोरा हटाएर तौल गर्दा १३९ किलो रहेको प्रहरीले जनाएको छ।
फरार व्यक्तिहरूको खोजी भइरहेको तथा बरामद गाँजाका सम्बन्धमा थप अनुसन्धान र आवश्यक कानुनी कारबाही अघि बढाइएको जिल्ला प्रहरी कार्यालय बाराले जनाएको छ।
