नेपाल-तिब्बत सीमामा आएको विनाशकारी पहिरो र आकस्मिक बाढीपछि हलिउड अभिनेता रिचर्ड गेरेले नेपाल र तिब्बतका जनताप्रति ऐक्यबद्धता जनाएका छन् ।
‘आज मेरो मन नेपाल र तिब्बतका जनतासँग छ,’ गेरेले सामाजिक सञ्जालमा पोस्ट गरेको सन्देशमा लेखेका छन् ।
गेरेको नेपाल र तिब्बतसँग करिब ५० वर्षदेखि गहिरो सम्बन्ध छ । उनी सन् १९७८ मा ब्राजिलियन चित्रकार सिल्भिया मार्टिन्ससँग पहिलोपटक नेपाल आएका थिए । त्यस क्रममा तिब्बती भिक्षु र लामाहरूसँग भएको भेटपछि उनी सन् १९८० को दशकको सुरुवातमा तिब्बती बौद्ध धर्ममा दीक्षित भएका थिए ।
त्यसयता उनले तिब्बती जनताको मानवअधिकार र उनीहरूको संस्कृति संरक्षणका पक्षमा वकालत गर्दै आएका छन् ।
‘यो संसारमा केही यस्ता ठाउँ हुन्छन्, जसले एकपटक तपाईंको हृदय छोएपछि वास्तवमै कहिल्यै छाड्दैनन् । हिमालय, त्यहाँका मानिस, उनीहरूको आध्यात्मिकता र असाधारण सुन्दरता धेरै वर्षदेखि मेरो जीवन र हृदयको हिस्सा बनेका छन्’ गेरेले पोस्टमा लेखेका छन् ।
उनले नेपालदेखि तिब्बतको ग्यिरोङ र सिगात्से क्षेत्रसम्म बाढीले पुर्याएको विनाश देख्दा हृदयविदारक लागेको बताएका छन् ।
‘यी बाढीले नेपालदेखि ग्यिरोङ र तिब्बतको सिगात्से क्षेत्रसम्म पुर्याएको विनाश देख्नु हृदयविदारक छ । आशा पनि जीवित छ । आज हाम्रो करुणाको कुनै सीमा छैन,’ उनले लेखेका छन् ।
अभिनेता गेरे बेला-बेलामा नेपाल भ्रमणमा आउने गर्छन् ।
