: धादिङको बेनीघाट रोराङ गाउँपालिका-३ सलाङघाटस्थित चितवन स्टाफ होटलका सञ्चालकमाथि हम्मर प्रहार गरेको आरोपमा १४ वर्षीय बालकलाई प्रहरीले नियन्त्रणमा लिएको छ।
होटलमा काम गर्ने ती बालक र होटल सञ्चालककी श्रीमतीबीच आर्थिक विषयमा भनाभन भएपछि होटल सञ्चालक घटनास्थलमा पुगेका थिए। त्यसक्रममा बालकले हम्मर प्रहार गर्दा होटल सञ्चालक घाइते भएको प्रहरीले जनाएको छ।
घटनापछि इलाका प्रहरी कार्यालय गजुरीले बालकलाई नियन्त्रणमा लिएर हिरासतमा राखेको जिल्ला प्रहरी कार्यालय धादिङका सूचना अधिकारी एवं प्रहरी नायब उपरीक्षक (डीएसपी) प्रकाश दाहालले जानकारी दिए।
१४ वर्षीय बालकलाई हिरासतमा राख्न मिल्छ कि मिल्दैन भन्ने विषयमा डीएसपी दाहालले १० वर्षभन्दा माथिका बालबालिकालाई अभियोगको प्रकृतिअनुसार नियन्त्रणमा लिएर हिरासतमा राख्न सकिने बताए।
