: आज (शुक्रबार) भाद्र कृष्ण औंसीका अवसरमा देशभर कुशे औंसी तथा बाबुको मुख हेर्ने पर्व श्रद्धा र निष्ठाका साथ मनाइँदै छ।
वैदिक सनातन हिन्दू धर्मावलम्बीहरूले आज वर्षभरि देवकार्य तथा पितृकार्यका लागि आवश्यक पर्ने पवित्र कुश घरघरमा भित्र्याएका छन्। शास्त्रोक्त विधिअनुसार ब्राह्मणद्वारा पूजा गरी छेदन गरिएको कुश घरमा राख्नाले परिवारको कल्याण हुने धार्मिक विश्वास छ। वर्षको एकपटक शुभ साइत पारेर ब्राह्मणको घरबारी वा पाखामा उम्रिएको कुश ओखल्ने वा काट्ने परम्परा रहँदै आएको छ।
नेपाली परम्परामा माता, पिता र गुरुलाई विशेष सम्मान गर्ने विधान रहेको छ। आजको दिन जीवित बाबु हुने सन्तानहरूले आफ्ना पितालाई मनपर्ने मीठा-मसिना पकवान र वस्त्र उपहार दिई आदर-सम्मान व्यक्त गर्छन्।
त्यस्तै, दिवंगत पितृका नाममा श्राद्ध तथा पिण्डदान गर्न काठमाडौँको उत्तरपूर्वी भेगस्थित उत्तरगयाका रूपमा परिचित गोकर्णेश्वर महादेव मन्दिर परिसर तथा बागमती किनारमा बिहानैदेखि भक्तजनको घुइँचो लागेको छ। दिवंगत बाबुको स्मरणमा तर्पण, सिदादान र पिण्डदान गर्नाले २१ कुलसम्मका पितृहरू तर्छन् भन्ने धार्मिक मान्यता छ।
प्रत्येक वर्ष भाद्र कृष्ण औंसीका दिन गोकर्णेश्वरमा विशेष मेला लाग्ने भएकाले यस दिनलाई 'गोकर्णे औंसी' पनि भन्ने गरिन्छ।
