। दक्षिण अफ्रिकाका पूर्व क्रिकेटर इमरान ताहिरले ४७ वर्षको उमेरमा टी–२० क्रिकेटमा ५-विकेट प्रदर्शन गर्दै नयाँ कीर्तिमान बनाएका छन् । उनले क्यारेबियन प्रिमियर लिग (सीपीएल) मा गयाना अमेजन वारियर्सका लागि सेन्ट लुसिया किंग्सविरुद्ध यो उपलब्धि हासिल गरेका हुन् ।
प्रोभिडेन्समा बुधबार भएको खेलमा ताहिरले चार ओभरमा १७ रन खर्चिएर ५ विकेट लिए । यो उनको टी–२० क्रिकेट करियरकै उत्कृष्ट बलिङ प्रदर्शन समेत हो । उनले आफ्नो ४६१औं टी–२० खेलमा यो कीर्तिमान बनाएका हुन् ।
ताहिरले सन् २००६ मा पाकिस्तानको घरेलु क्रिकेटबाट टी–२० करियर सुरु गरेका थिए । चार दशक पार गरिसक्दा पनि उनी गयानाको कप्तान तथा प्रमुख स्पीनरका रूपमा सक्रिय छन् ।
खेलपछि ताहिरले आफ्नो छोराले अझै क्रिकेट खेल्न प्रेरित गरिरहेको बताए । उनका अनुसार छोराले ‘ड्याडी, अझै एक वर्ष खेल्नुस्’ भन्दै आफूलाई निरन्तर खेलिरहन प्रेरित गर्ने गरेका छन् ।
“मेरो छोराले नै मलाई सबैभन्दा बढी प्रेरित गरिरहेको छ । उसले ‘ड्याडी, अझै एक वर्ष, त्यसपछि मसँगै खेल्नुपर्छ’ भनिरहन्छ। उसलाई र विश्वभर मलाई हेरिरहेका युवा खेलाडीलाई प्रेरित गर्न पनि म खेलिरहन चाहन्छु” ताहिरले भने।
सेन्ट लुसिया किंग्सलाई ११९ रनमै रोक्ने क्रममा ताहिरले कमिल पूरनलाई ४३ रनमा एलबीडब्ल्यू आउट गरेका थिए । उनले म्याथ्यु फोर्डेलाई पनि आफ्नो गुग्लीमार्फत बोल्ड गरेका थिए ।
ताहिरले प्रोभिडेन्सको पिचमा बलले राम्रोसँग टर्न पाएको र सही लाइन तथा लेन्थमा बलिङ गर्दा सफलता मिलेको बताए ।
ताहिरको उत्कृष्ट बलिङपछि क्वेन्टिन स्याम्पसनले ११ बलमा अविजित ३७ रन बनाएपछि गयाना अमेजन वारियर्सले लक्ष्य सहजै पूरा गरेको थियो । उनको स्ट्राइक रेट ३३६.३६ थियो।
सीपीएलको यस सिजन प्लेअफमा स्थान सुरक्षित गरिसकेको गयाना अमेजन वारियर्सले अब सेप्टेम्बर ११ मा ट्रिनबागो नाइट राइडर्ससँग समूह चरणको अर्को खेल खेल्नेछ ।
