: मोटरसाइकलको ठक्करबाट ५ पैदलयात्रीसहित ७ जना घाइते भएका छन् । जिल्लाको मदाने गाउँपालिका–४ नातिनडाँडास्थित बाझकटेरीबाट पुर्कोटदहतर्फ आउँदै गरेको लु २ प ७९२९ नम्बरको मोटरसाइकलले बाटोमा हिँडिरहेका ५ जना पैदलयात्रीलाई ठक्कर दिँदा मोटरसाइकल चालक, पछाडि सवार व्यक्ति र अन्य ५ पैदलयात्री गरी ७ जना घाइते भएका हुन्।
मोटरसाइकल मदाने गाउँपालिका–४ धारापानी बस्ने १७ वर्षीय खुमबहादुर सुनारले चलाएका थिए। घाइते हुनेहरुमा मोटरसाइकल चालकसंगै पछाडि सवार २० वर्षीय माधव सुनार र पैदलयात्रीहरु मदाने गाउँपालिका–२ पञ्चपोखरीकी २६ वर्षीया लक्ष्मी विक, बाझकटेरी नेटाकी ३५ वर्षीया कबिता भुसाल, भुसालकी छोरी ९ वर्षीया अर्चना भुसाल, सोही स्थानकी ४० वर्षीया कमला विक र १ वर्षीया सबिना विक रहेका छन्।
घाइतेहरूलाई उपचारका लागि स्थानीय मेडिकल पुर्कोटदह, गुल्मीमा लगिएको छ। मोटरसाइकल नियन्त्रणमा लिइएको र घटनासम्बन्धमा थप अनुसन्धान भइरहेको प्रहरीले जनाएको छ।
