। विनाशकारी बाढीको असरका बीच पनि पार्टीको ‘क्यान्डिडेट क्लब’ मा उत्साहप्रद आवेदन परेको रास्वपाले दाबी गरेको छ ।
रास्वपाले गाउँपालिकामा जनप्रतिनिधि हुन इच्छुकका लागि १ भदौबाट आवेदन सुरु गरेको थियो । आवेदन सुरु गरेको ठिक १० दिनपछि (१० भदौ) भोटेकोशी बाढीले पार्टीका सबै गतिविधिहरू स्थगित हुन पुगेका थिए । बाढी आएकै दिन रास्वपाको सचिवालय बैठक बसेर सबै साङ्गठनिक गतिविधि स्थगित गर्ने निर्णय गरेको थियो ।
बैठकको निर्णयमा भनिएको थियो, ‘यस संवेदनशील घडीमा हाम्रो सम्पूर्ण ध्यान र ऊर्जा विपद् व्यवस्थापन, उद्धार र राहत कार्यमा मात्र केन्द्रित गर्नुपर्ने भएकाले, विपद् प्रभावित नागरिकहरूलाई पूर्ण रूपमा साथ दिन पार्टीका पूर्वनिर्धारित सम्पूर्ण आधिकारिक, राजनीतिक तथा साङ्गठनिक गतिविधिहरू अर्को सूचना जारी नभएसम्मका लागि स्थगित गर्ने निर्णय गरिएको छ ।’
पार्टीका अरू सांगठनिक कार्यहरू रोकिए पनि उम्मेदवार क्लबका कार्यले निरन्तरता पाएको महामन्त्री विपिन आचार्यले जानकारी दिए । आचार्यले पार्टीले सोचेभन्दा बढी आवेदनहरू प्राप्त भइरहेको दाबी गरे ।
‘गाउँपालिका अध्यक्ष, उपाध्यक्ष, वडाध्यक्ष र सदस्यको उम्मेदवार हुनका लागि हामीलाई प्राप्त आवेदनको संख्या देखेर हौसला पाइरहेका छौं,’ महामन्त्री आचार्यले अनलाइनखबरसँग भने । आवेदन संकलन कार्य जारी रहेकाले संख्या भनिहाल्ने अवस्था नरहेको रास्वपाले जानकारी गराएको छ ।
पहिलो चरणमा गाउँपालिकाको उम्मेदवार हुन इच्छुकका लागि आवेदन खुला गरिएको थियो । यसपछि नगरपालिका, उपमहानगर र महानगरमा उम्मेदवार हुने आकांक्षीका लागि आवेदन खुला गर्ने जानकारी गराइएको छ ।
गाउँपालिकाको हकमा खुला गरिएको क्यान्डिडेट क्लबको आवदेन कुन मितिसम्म खुला राखिने भन्नेबारे रास्वपाले निर्णय लिएको छैन । गाउँपालिकाको आवेदन समय यथावत राखेर वा स्थगित गरेर नगरपालिका, उपमहानगर र महानगरमा आवेदन खुलाउन सकिने महामन्त्री आचार्यले जानकारी दिए ।
स्थानीय तहको निर्वाचनमा योग्य र सक्षम उम्मेदवार छनोट गर्ने उद्देश्यले रास्वपाले क्यान्डिडेट क्लबमा आवेदन खुला गरेको थियो । भदौ १० गते आएको बाढीले सांगठनिक कार्यहरू स्थगित गर्नु परेको हुँदा क्यान्डिेडेट क्लबमा पनि असर परेको कोशीका सभापति चन्द्र राई बताउँछन् ।
विगतमा नेपालका पार्टीहरूले अवलम्बन नगरेको नयाँ विधि भएकोले बुझाउनुपर्ने आवश्यकता रहेको प्रदेश सभापति राईले बताए । ‘नयाँ अभ्यास हो । प्राविधिक रूपमा पनि बुझाउनु पर्नेछ,’ राईले अनलाइनखबरसँग भने, ‘केहीले आवेदन भरेका छन् । कोही भने पर्ख र हेरको अवस्थामा छन् ।’
क्यान्डिडेट क्लबका बारेमा तल्लो तहमा अभिमुखीकरण गर्ने योजना रास्वपाले बनाएको थियो । बाढीका कारण अभिमुखीकरणका कार्यक्रम रोकिएका छन् । क्यान्डिडेट क्लबको महत्व, छनोट विधि लगायतमा कार्यकर्तालाई प्रशिक्षित गर्न बाढीले असर पुर्याएको छ ।
सांगठनिक कार्यहरू ठप्प हुँदा अभिमुखीकरण, प्रशिक्षण लगायतका कार्य हुन नसकेको नेताहरूले जानकारी गराएका छन् । उम्मेदवार हुनका लागि गण्डकीका गाउँपालिकाहरूमा उत्साहप्रद आवेदनहरू आइरहेको गण्डकीका सभापति नवीन त्रिपाठीले बताए ।
क्यान्डिडेट क्लबका बारेमा पालिकाहरूमा पुगेर जानकारी गराउने कार्य बाढीले रोक्नु परेको प्रदेश सभापति त्रिपाठीले बताए । ‘पालिकाहरूमा पुगेर यसका बारेमा जानकारी गराउने कार्ययोजना बनाएका थियौं । बाढीका कारण स्थगित गर्नुपर्ने भयो,’ त्रिपाठीले अनलाइनखबरसँग भने ।
विस्तारित बैठक नसकिएका तनहुँ, पर्वत, वागलुङ लगायतका जिल्लामा कार्यक्रम राखेर क्यान्डिडेट क्लबबारे पार्टी सदस्य र शुभेच्छुकहरूलाई जानकारी गराउने त्रिपाठीले जानकारी गराए ।
बाढीबाट रसुवा, नुवाकोट र धादिङ बढी प्रभावित भए । यी जिल्लाहरूको हकमा फरक के विधि अपनाउने भन्ने विषयमा पार्टीले निर्णय लिइसकेको छैन । महामन्त्री आचार्यका अनुसार ती जिल्लामा राहत र पुनर्निर्माणमा पार्टीको मूल ध्यान रहेको हुँदा उम्मेदवार आवेदनका बारेमा हाल कुनै सोच नबनाएको आचार्यले बताए ।
बागमतीका सभापति उत्सव अर्याल ती जिल्लाका बारेमा छुट्टै तरिकाले सोच्नुपर्ने बताउँछन् । रसुवा, नुवाकोट र धादिङका प्रभावित पालिकाको उम्मेदवार आवेदनमा पार्टीले नयाँ तरिकाले सोच्नुपर्ने प्रदेश सभापति अर्यालले बताए ।
उम्मेदवार क्लबमा दर्ता हुन इच्छुक उम्मेदवारका लागि पहिलो खुड्किलो हो । उम्मेदवार हुनका लागि पार्टीले बनाएको विधिअनुसार चार चरण पार गर्नुपर्छ । प्रारम्भिक मतदानबाट उम्मेदवार छनोट गर्ने विधि बनाइएको छ । प्रारम्भिक निर्वाचनका लागि ४० प्रतिशत मतभार तोकिएको छ । प्राइमरी इलेक्सनमा पनि सबैभन्दा बढी मतभार स्थानीय सदस्यहरूको हुने गरी विधि बनाइएको छ ।
प्राइमरी इलेक्सनका मतदाता सम्बन्धित स्थानका सबै सदस्य हुने छन् । सम्बन्धित पालिकाका पार्टी सदस्यहरूलाई भारांक सबैभन्दा बढी ७५ प्रतिशत छ । उम्मेदवार हुन इच्छुकले आवेदनपश्चात् लिडरसिप एकेडेमीको कक्षा लिनुपर्छ
उम्मेदवारका आकांक्षीहरूको ‘पोलिटिकल प्रोक्सिमिटी’ मूल्यांकन गरिने भएको छ । यस मापदण्डमा सांगठनिक आवद्धता, विगतको भूमिका र अनुशासन, निर्वाचित हुने सम्भाव्यता, बहुआयामिक लोकप्रियता, शैक्षिक–पेसागत अनुभव, तटस्थ सामाजिक परीक्षण लगायतमा मूल्यांकन गर्ने विधि बनाइएको छ ।
स्थानीय तहका उम्मेदवारको आकांक्षी हुनका लागि पार्टी सदस्यता लिएको, अन्य दल परित्याग गरेको समय–सीमासमेत रास्वपाले निर्धारण गरेको छ ।
विगतमा अन्य राजनीतिक दलमा नरहेको र रास्वपाको सदस्यता लिएको व्यक्तिको हकमा सदस्यता लिएको ४५ दिन पूरा भएपछि उम्मेदवार क्लबमा आवेदन दिन सकिने व्यवस्था गरिएको छ । अन्य दल त्यागेकाहरूको हकमा तीन महिना पुगेको भए मात्रै उम्मेदवार क्लबमा आवेदन पेस गर्न सकिनेछ ।
समाजका प्रतिष्ठित, विज्ञ, सार्वजनिक रूपमा स्वच्छ छवि भएका व्यक्तिको हकमा तोकिएका समिति तथा निकायहरूको सहमतिबमोजिम विशेष प्रक्रियामार्फत आवेदन दिन सकिने विधि बनाइएको छ ।
रास्वपाको अघिल्लो समितिमा सहमहामन्त्री रहेका हालका महामन्त्री आचार्यको नेतृत्वमा उम्मेदवार छनोट रूपरेखा बनाइएको थियो ।
