: मोरङको सुनवर्षी नगरपालिका–८ हर्चनगढीमा मोटरसाइकल पुलबाट खस्दा भारतीय नागरिकको मृत्यु भएको छ । दुर्घटनामा अर्का एक जना घाइते भएका छन् ।
डाइनियाबाट सिक्टीतर्फ जाँदै गरेको भारतीय नम्बर प्लेटको बीआर ३८ एल ७९२० मोटरसाइकल मंगलबार राति करिब सवा ९ बजेतिर हर्चनगढी पुलबाट अन्दाजी ८ मिटर तल खसेको थियो ।
प्रहरीका अनुसार तीव्र गतिमा रहेको मोटरसाइकल अनियन्त्रित भएपछि चालक भारतको अररिया थाना पलासी गोठगाउँका अन्दाजी ४० वर्षीय मुना मण्डल गम्भीर घाइते भएका थिए । उनलाई तत्काल उपचारका लागि रंगेली अस्पताल पुर्याइएको थियो । तर, राति १० बजेतिर चिकित्सकले मृत घोषणा गरेको प्रहरीले जनाएको छ ।
मोटरसाइकलको पछाडि सवार सुनवर्षी–८ हर्चनगढीका अन्दाजी ३५ वर्षीय दिपेश मण्डल पनि घाइते भएका छन् । उनको अवस्था सामान्य रहेको र रंगेली अस्पतालमा उपचार भइरहेको प्रहरीले जनाएको छ ।
