: नेपाल–चीन सीमा व्यवस्थापन, सुरक्षा तथा सीमावर्ती क्षेत्रका साझा विषयमा छलफल गर्न हुम्ला र बझाङका प्रमुख जिल्ला अधिकारीसहित सुरक्षा निकायका प्रमुखहरूको टोली चीनको पुलान काउन्टी पुगेको छ।
चिनियाँ सरकारको निमन्त्रणामा सेप्टेम्बर १४ देखि १७ तारिखसम्म सञ्चालन हुने सीमा वार्तामा सहभागी हुन टोली त्यहाँ पुगेको हुम्लाका सहायक प्रमुख जिल्ला अधिकारी चन्द्रवीर शाहीले बताए। उनका अनुसार चार दिनसम्म चल्ने वार्तामा भन्सार, अध्यागमन, सीमा सुरक्षा तथा सीमासँग सम्बन्धित विभिन्न विषयमा दुई पक्षबीच छलफल हुनेछ।
बाढीपहिरोका कारण दार्चुलाको टोली भने वार्तामा सहभागी हुन नसकेको बताउँदै हुम्लाबाट प्रमुख जिल्ला अधिकारी भोलानाथ गुरागाईं, जिल्ला प्रहरी कार्यालयका प्रहरी नायब उपरीक्षक शंकर खड्का, सशस्त्र प्रहरी बलका प्रहरी नायब निरीक्षक नन्दबहादुर साउद तथा चीनसँग सीमा जोडिएको नाम्खा गाउँपालिकाका अध्यक्ष प्रेमबहादुर लामा सहभागी छन्। त्यस्तै, बझाङबाट प्रमुख जिल्ला अधिकारी मुकेशकुमार केशरी, जिल्ला प्रहरी कार्यालयका प्रहरी नायब उपरीक्षक टेकबहादुर जोरा, चीनसँग सीमा जोडिएको साइपाल गाउँपालिकाका अध्यक्ष मानवीर बोहोरा तथा सशस्त्र प्रहरी बलका प्रमुख उज्ज्वल लामिछाने लगायतको सहभागिता रहेको छ। टोली असोज १ गते हुम्ला फर्किने कार्यक्रम छ।
सीमा वार्ताको अवसर पारेर हुम्लाको नाम्खा गाउँपालिका र चीनको तिब्बत स्वायत्त क्षेत्रअन्तर्गत आली प्रिफेक्चरको पुलान काउन्टीबीच भगिनी सम्बन्ध स्थापना गर्ने आशयपत्रमा हस्ताक्षर भएको छ। नाम्खा गाउँपालिकाका अध्यक्ष प्रेमबहादुर लामाले आशयपत्रमा हस्ताक्षर गरेका हुन्।
दुई छिमेकी क्षेत्रबीच आपसी मित्रता, सद्भाव, सांस्कृतिक आदानप्रदान तथा आर्थिक सहकार्यलाई थप सुदृढ बनाउने उद्देश्यले आशयपत्रमा हस्ताक्षर गरिएको अध्यक्ष लामाले बताए। यस समझदारीले कृषि, पशुपालन, पर्यटन, संस्कृति तथा अन्य साझा हितका क्षेत्रमा सहकार्यका नयाँ सम्भावनाहरू खोल्ने अपेक्षा गरिएको छ।
कर्णाली करिडोरको हुम्ला खण्ड अवरुद्ध
लगातारको वर्षासँगै आएको बाढी र पहिरोका कारण कर्णाली करिडोरको हुम्ला खण्डका विभिन्न स्थानमा सडक अवरुद्ध भएको छ। सर्केगाड गाउँपालिका–४ स्थित थाहा खोलामा माथिबाट लेदोसहितको बाढी आएपछि सडक पूर्ण रूपमा अवरुद्ध हुनुका साथै आसपासका बालीनालीमा समेत क्षति पुगेको छ। सर्केगाड–१ जैरका स्थानीय खगेन्द्र धामीका अनुसार बिहान करिब तीन घण्टा लगातार भएको वर्षापछि थाहा ज्युलोमा बाढी पसेर खेतीयोग्य जमिनको बालीनाली नष्ट भएको छ। सर्केगाड खोलामा पानीको बहाव बढ्दा सर्केगाड बजार क्षेत्र तथा आसपासमा समेत क्षति पुगेको स्थानीय व्यापारी लक्ष्मण फडेराले बताए। माथिबाट ढुंगा, माटो र लेदो खसेपछि सडक पूर्ण रूपमा अवरुद्ध भएको सर्केगाड प्रहरी चौकीका इन्चार्ज प्रहरी सहायक निरीक्षक जगदीशकुमार ऐरले जानकारी दिए।
लगातारको वर्षापछि कर्णाली करिडोरअन्तर्गत सर्केगाड गाउँपालिका–६ ग्युसीदेखि खार्पुनाथ गाउँपालिका–५ खार्पुसम्म विभिन्न स्थानमा पहिरो खसेपछि यातायात प्रभावित भएको छ। कतिपय ठाउँमा पहिरोले सडक पूरै पुरिएको छ भने केही खण्डमा सडक साँघुरिएपछि जोखिम मोलेर सवारीसाधन सञ्चालन भइरहेका छन्। चंखेली गाउँपालिकाका स्वास्थ्य संयोजक शूरवीर शाहीका अनुसार सडक अवरुद्ध हुँदा दक्षिणी हुम्लाबाट सदरमुकाम सिमकोटतर्फ आउने–जाने यात्रुहरू बढी प्रभावित भएका छन्। वर्षायाममा पहिरोले करिडोर पटक–पटक अवरुद्ध हुँदा जिल्लामा खाद्यान्न तथा दैनिक उपभोग्य वस्तुको आपूर्तिसमेत प्रभावित हुँदै आएको छ।
