। नेपाली कांग्रेसका सांसद विष्णुबहादुर खड्काले कर्णाली प्रादेशिक अस्पताल सुर्खेतमा तत्काल न्यूरोलोजिस्ट र कार्डियोलोजिस्ट चिकित्सकको व्यवस्था गर्न सरकारसँग माग गरेका छन् ।
प्रतिनिधि सभाको बिहीवारको बैठकमा बोल्दै उनले प्रादेशिक अस्पतालमा विशेषज्ञ चिकित्सकको अभावमा कर्णालीका बिरामीलाई उपचारका लागि लुम्बिनी प्रादेशिक अस्पताल तथा राजधानी काठमाडौं रिफर गर्नुपर्ने अवस्था रहेको बताए ।
कर्णाली प्रादेशिक अस्पतालमा क्याथल्यावको मेसिन जडान भएको दुई वर्ष भइसक्दा पनि कार्डियोलोजिस्ट चिकित्सक उपलब्ध नभएको उनले बताए ।
‘हामी सबैलाई थाहा छ कर्णाली सबैभन्दा दुर्गम प्रदेश हो । विकासको हिसाबले पनि पछाडि परेको छ । र कर्णाली प्रादेशिक अस्पतालमा अहिले विशेषज्ञ चिकित्सकहरूको अभाव छ । क्याथल्याबको मेसिन जडान भएको दुई वर्ष भइसकेको छ । कार्डियोलोजिस्ट डाक्टर त्यहाँ हुनुहुन्न । न्युरोलोजिष्ट डाक्टरसाब पनि त्यहाँ हुनुहुन्न,’ उनले भने ।
यस्तै, अस्पतालमा न्यूरोलोजिस्ट चिकित्सकसमेत अभाव रहेको बताउँदै उनले कर्णालीको भौगोलिक विकटता, गरिबी र सडक दुर्घटनाका कारण गम्भीर अवस्थाका बिरामीलाई हिमाली क्षेत्रबाट समेत हेलिकप्टरमार्फत अस्पताल ल्याउने गरिएको उल्लेख गर्दै खड्काले न्यूरोसम्बन्धी उपचार नहुँदा समस्या हुने गरेको बताए ।
‘कर्णाली प्रदेश विकट प्रदेश हो । गरिबी छ, अशिक्षा छ । भूगोल एकदमै नमिलेको छ । गाडी र सवारी साधनहरू पनि बाटोको कारणले गर्दाखेरी धेरै दुर्घटना हुने गरेको छ । विभिन्न हिमाली क्षेत्रबाट समेत हेली रेस्क्यू गरेर बिरामीहरूलाई त्यहाँ ल्याइन्छ,’ उनले भने, ‘तर त्यहाँ टाउकोको उपचार नहुने समस्याको कारणले गर्दाखेरी अधिकांश विरामीहरू न्यूरो विशेषज्ञले हेर्नुपर्ने विरामीहरू लुम्बिनी प्रादेशिक अस्पतालमा र काठमाडौं रिफर गर्नुपर्ने अवस्था रहेको छ । त्यसैले प्रादेशिक अस्पतालमा तत्काल न्यूरोलोजिष्ट डाक्टरको तत्काल उपलब्धता हुनुपर्यो ।’
