: नेपाली फुटबलको नियमनकारी निकाय अखिल नेपाल फुटबल संघ (एन्फा)ले निलम्बन फुकुवाका लागि सरकारले ठोस कदम नचालेमा सोमबारबाट काममा फर्कने निर्णय गरेको छ।
बिहीबार पत्रकार सम्मेलन गर्दै एन्फाले सोमबारदेखि आफ्नो कार्यालय सञ्चालनसहित नियमित काममा फर्कने निर्णय गरिएको जानकारी दिएको छ। शुक्रबारसम्म समस्या समाधानको सकारात्मक पहल नगरे फिफाको निर्देशन अनुसार नै आफ्ना दैनिक गतिविधिहरू अगाडि बढाउने जानकारी एन्फाले दिएको छ।
कामकारवाही रोक्न राखेपले गरेको निर्णय बिनासर्त खारेज गरी हालको एन्फा कार्यसमितिलाई पुनर्बहाली गर्नुपर्ने र विधान अनुसार रोकिएको निर्वाचन प्रक्रिया यथाशीघ्र अघि बढाउनुपर्ने मुख्य सर्त रहेको एन्फाका प्रमुख कार्यकारी अधिकृत (सीईओ) इन्द्रमान तुलाधरले बताए।
नेपाल सरकारले एन्फामाथि हस्तक्षेप नभएको भन्दै पत्र दिएको अवस्थामा एन्फा पुनः नियमित काममा फर्कन सक्ने एन्फा महासचिव किरण राईले अन्नपूर्ण पोस्ट्लाई जानकारी दिए। महासचिव राईले सरकारसंग थप विवाद वा टकराव गर्ने पक्षमा एन्फा नरहेको भन्दै छलफलबाटै निकास खोज्नुपर्ने बताए। ‘एन्फामाथि हस्तक्षेप छैन भन्दै सरकारको तर्फबाट पत्र पाएमा हामीहरु नियमित काममा फर्किन पाउनेछौं।,’ राईले भने।
