: राष्ट्रपति रामचन्द्र पौडेलले संविधान दिवस तथा राष्ट्रिय दिवस, २०८३ को सुखद अवसरमा देश तथा विदेशमा रहेका सम्पूर्ण नेपालीमा शुभकामना व्यक्त गर्दै संविधानको पूर्ण कार्यान्वयनलाई मुख्य राष्ट्रिय संकल्प बनाउनुपर्नेमा जोड दिएका छन्।
साथै, उनले हालै रसुवाको भोटेकोशीमा आएको विनाशकारी बाढीबाट प्रभावित नागरिकहरूको उद्धार, राहत तथा पुनर्नस्थापनाका लागि सबै पक्षलाई एकताबद्ध भएर जुट्न विशेष आह्वानसमेत गरे।
राष्ट्रपतिको कार्यालयबाट जारी शुभकामना सन्देशमा राष्ट्रपति पौडेलले मुलुकमा लोकतान्त्रिक गणतन्त्र स्थापनाका लागि आफ्नो अमूल्य जीवन उत्सर्ग गर्ने सम्पूर्ण ज्ञात-अज्ञात सहिदहरूप्रति भावपूर्ण श्रद्धाञ्जली अर्पण गरेका छन्। साथै, उनले ऐतिहासिक लोकतान्त्रिक आन्दोलनमा नेतृत्वदायी भूमिका निर्वाह गर्ने राजनीतिक दलका नेताहरू र अग्रभागमा खट्ने आम नागरिकको योगदानको उच्च प्रशंसा गरे।
संविधान सभाबाट नयाँ संविधान जारी भएको एक दशकभन्दा बढी समय व्यतीत भइसकेको सन्दर्भमा नागरिक स्वतन्त्रता, समावेशी प्रतिनिधित्व र कानुनको शासनजस्ता महत्त्वपूर्ण उपलब्धि हासिल भएको स्मरण गराउँदै राष्ट्रपति पौडेलले भने, 'संविधानले निर्दिष्ट गरेका व्यवस्थाको पूर्ण परिपालना गरी प्रशासनिक जवाफदेहिता र सुशासन कायम गर्नु आजको प्राथमिक आवश्यकता हो।'
आफ्नो सन्देशमा उनले बहुजातीय, बहुभाषिक र बहुसांस्कृतिक मुलुक नेपालमा आपसी सद्भाव, भ्रातृत्व र सहअस्तित्व कायम राख्दै समाजवादउन्मुख अर्थतन्त्र निर्माणको दिशामा अग्रसर हुन सम्पूर्ण नेपालीहरूमा आग्रहसमेत गरेका छन्।
