फिलिपिन्सको एक विद्यालयमा गोली चल्दा दुई विद्यार्थीसहित कम्तीमा तीन जनाको मृत्यु भएको छ । घटनामा अन्य केही विद्यार्थी घाइते भएका छन् । घाइते भएका केही विद्यार्थीलाई अस्पताल लगिएको छ ।
मृतकमध्ये एक जना संदिग्ध बन्दुकधारी रहेको बताइएको छ ।
फिलिपिन्स राष्ट्रिय प्रहरीका अनुसार घटनामा तीन जनाको मृत्यु भएको पुष्टि भएको छ ।
स्थानीय समयअनुसार शुक्रबार दिउँसो करिब १:३० बजे मिन्डानाओको दक्षिण कोटाबाटो प्रान्तस्थित बांगा नेसनल हाईस्कुलमा गोली चलेको हो ।
दक्षिण कोटाबाटोका गभर्नर रेनाल्डो तामायोले दुई विद्यार्थीको मृत्यु भएको बताएका छन् । मृत्यु हुनेमा १४ वर्षीय एक छात्र र १४ वर्षीया एक छात्रा छन् ।
घटनाको कारणबारे तत्काल कुनै जानकारी सार्वजनिक भएको छैन । प्रहरीले घटनाबारे अनुसन्धान भइरहेको जनाएको छ । घटनास्थलमा पुगेका प्रहरी अधिकारीहरूले तत्काल क्षेत्र सुरक्षित बनाउँदै विद्यालय प्रशासन र स्वास्थ्यकर्मीहरूसँग समन्वय गरेर प्रभावित विद्यार्थी तथा कर्मचारीलाई सहयोग गरिरहेका छन् ।
एएफपीले प्रमाणीकरण गरेको फेसबुकमा सार्वजनिक एउटा भिडियोमा एक पुरुषले विद्यालयबाट घाइते बालकलाई बोकेर बाहिर ल्याइरहेको देखिन्छ ।
अर्को भिडियोमा स्थानीय भाषामा बोलिरहेकी एक शिक्षिकाले दुई जना बन्दुकधारी रहेको बताएको सुनिन्छ । एक विद्यार्थीले भने उनीहरू बाहिरबाट आएका व्यक्ति भएको बताएका छन् ।
लगातार विद्यालयमा गोलीकाण्ड
अगस्टमा फिलिपिन्सकै एक निजी विश्वविद्यालय परिसरमा एक हाईस्कुल विद्यार्थीले गोली चलाउँदा एक विद्यार्थीको मृत्यु भएको थियो भने दुई जना घाइते भएका थिए । त्यसपछि बन्दुकधारीले आफैंलाई गोली हानेका थिए ।
यसअघि जुनमा देशको पूर्वी क्षेत्रमा रहेको टाक्लोबान सहरमा भएको अर्को विद्यालय गोलीकाण्डमा तीन विद्यार्थीको मृत्यु भएको थियो भने करिब २० जना घाइते भएका थिए ।
