: प्रधानमन्त्रीको प्रमुख सल्लाहकारको नाम लिँदै ठगी गर्ने दुई जना पक्राउ परेका छन्। पक्राउ पर्नेमा रामेछापका भरत चौलागाईं र दोलखाका बालिका शिवाकोटी छन्।
नेपालबाट इजरायलमा केयर गिभरका लागि कामदार पठाउने भन्दै उनीहरूले प्रधानमन्त्रीको प्रमुख सल्लाहकारको नाम तथा पदको दुरुपयोग गरी ठगी गरेको नेपाल प्रहरीको केन्द्रीय अनुसन्धान ब्युरो (सीआईबी)ले जनाएको छ।
प्रहरीका अनुसार नेपाल सरकार र इजरायल सरकारबीच भएको जीटुजी सम्झौताअनुसार वैदेशिक रोजगारीका लागि इजरायल पठाउने भन्दै उनीहरूले सन् २०२४ मा नेपाल सरकारले लिएको परीक्षामा सहभागी परीक्षार्थीमध्ये इजरायल जान लक्की ड्रमा नपरेका १५६ जना व्यक्तिलाई लक्षित गरेका थिए।
उनीहरूले प्रधानमन्त्रीको प्रमुख सल्लाहकारको नाम तथा पदको दुरुपयोग गर्दै प्रतिव्यक्ति ६ लाख २० हजार रुपैयाँ लिएर इजरायल पठाइदिने विश्वास दिलाएको प्रहरीको भनाइ छ। यसरी झुक्याई पीडितहरूबाट जम्मा २ करोड ५० लाख रुपैयाँ ठगी गरेको सम्बन्धमा प्रहरीमा जाहेरी परेको थियो।
जाहेरीका आधारमा अनुसन्धान अघि बढाएको सीआईबीले उनीहरूलाई मुलुकी अपराध संहिता, २०७४ को परिच्छेद २१ अन्तर्गत ठगीसम्बन्धी कसुरमा पक्राउ गरेको जनाएको छ। पक्राउ परेकाहरूलाई काठमाडौं जिल्ला अदालतबाट कानुनी म्याद थप अनुमति लिई थप अनुसन्धान भइरहेको प्रहरीले जनाएको छ।
