। संयुक्त राज्य अमेरिकाले संविधान दिवसको अवसरमा नेपाली जनतालाई शुभकामना व्यक्त गरेको छ।
अमेरिकी विदेशमन्त्री मार्को रुबियोले शुभकामना सन्देश जारी गर्दै हालै नेपालमा आएको विनाशकारी बाढीबाट प्रभावितहरूको उद्धार तथा पुनर्लाभमा सहयोग गर्ने प्रतिबद्धतासमेत जनाएका छन्।
शुभकामना सन्देशमा विदेशमन्त्री रुबियोले बाढीमा परी ज्यान गुमाउनेहरूप्रति श्रद्धाञ्जली अर्पण गरेका छन्।
‘हालैको आकस्मिक बाढीबाट प्रभावित अमेरिकी नागरिकसहित सम्पूर्ण परिवार र समुदायप्रति हाम्रो गहिरो समवेदना छ,’ रुबियोले भनेका छन्, ‘खोज, उद्धार र पुनर्लाभको कार्य जारी रहँदा ज्यान गुमाउनेहरूप्रति शोक व्यक्त गर्न अमेरिका नेपालको साथमा छ र हामी यहाँका रिकभरी प्रयासहरूमा सहयोग गर्न प्रतिबद्ध छौँ।’
सन्देशमा नेपाल र अमेरिकाबीचको कूटनीतिक सम्बन्ध करिब ८० वर्ष लामो रहेको स्मरण गरिएको छ। आगामी दिनमा दुवै देशको हित हुने गरी व्यापार, नवप्रवर्तन र लगानीका क्षेत्रमा सहकार्य विस्तार गर्दै साझेदारीलाई अझ सुदृढ गर्न अमेरिका तत्पर रहेको विदेशमन्त्री रुबियोले स्पष्ट पारेका छन्।
