: इरानको सर्वोच्च राष्ट्रिय सुरक्षा परिषद्का सचिव मोहसेन रेजाईले कतार र पाकिस्तानका मध्यस्थकर्ताहरूमार्फत संयुक्त राज्य अमेरिकालाई वार्ताका लागि आफ्ना शर्तहरू पठाएको जानकारी दिएका छन्। इरान अब ती शर्तबारे अमेरिकी राष्ट्रपति डोनल्ड ट्रम्पको प्रतिक्रियाको पर्खाइमा रहेको छ।
रेजाईले इरानका मुख्य शर्तहरूमा सबै मोर्चामा जारी युद्धको अन्त्य, रोक्का गरिएका इरानी सम्पत्तिको फुकुवा तथा नौसैनिक नाकाबन्दीको समाप्ति रहेकाे जनाएका छन्। यस विषयमा कतार र पाकिस्तानी मध्यस्थकर्ताहरूसँग निरन्तर परामर्श भइरहेको उनले जानकारी दिए।
रेजाईले चेतावनी दिँदै यदि इरानमाथि आक्रमण गरिएमा आफ्ना सैन्य बलहरूले मध्यपूर्व क्षेत्रमा रहेका अमेरिकी सैन्य आधार शिविरहरूलाई अझ सशक्त रूपमा निशाना बनाउने बताए। इरानी सर्वोच्च राष्ट्रिय सुरक्षा परिषद्का सचिवले इरानले अहिलेसम्म परमाणु अप्रसार सन्धिबाट बाहिरिने निर्णय नगरेको र भावी कदम अमेरिकाको व्यवहारमा निर्भर रहने स्पष्ट पारे।
उनले इरान अझै पनि परमाणु हतियार निर्माण विरुद्ध जारी गरिएको सर्वोच्च नेताको धार्मिक आदेश (फतवा) मा प्रतिबद्ध रहेको र आफ्नो परमाणु नीतिमा कुनै परिवर्तन नगरेको दाबी गरे। यद्यपि, भविष्यमा विकसित हुने परिस्थितिबारे अहिल्यै केही भन्न नसकिने उनको भनाइ थियो।
यसैबीच रेजाईले साउदी अरब र यमनबीच जारी युद्ध अन्त्य हुनुपर्नेमा जोड दिएका छन्। यमनका हुथी विद्रोहीहरू पनि साउदी अरबसँग सम्झौता गर्न इच्छुक रहेको आफ्नो विश्वास रहेको उनले व्यक्त गरे।
