: बाराको जीतपुरसिमरा उपमहानगरपालिका–२ सिमरामा शनिबार साँझ चक्कु प्रहारबाट एक पुरुषको मृत्यु भएको छ । मृत्यु हुनेमा करिब ३५ वर्षीय शेरबहादुर खड्का रहेका छन् ।
खड्कालाई सिमरास्थित सम्झना स्टाफ होटलभित्र खाजा खाँदै गरेको अवस्थामा चक्कु प्रहार भएको हो । चक्कु प्रहारबाट खड्काको घाटीमा गम्भीर चोट लागेको प्रत्यक्षदर्शीले जानकारी दिएका छन् ।
घटना लगत्तै स्थानीयले घाइतेलाई जीतपुरसिमरा नगर अस्पताल हुँदै गण्डकस्थित बयोधा अस्पताल लगेका थिए । अस्पताल लैजाँदै गर्दा बाटोमा मृत्यु भएको हो ।
खड्कालाई चक्कु प्रहार गर्नेको नाम खुल्न सकेको छैन । होटलमा बसिरहेका बेला खड्कामाथी एक युवकले चक्कुले रेटेको प्रत्यक्षदर्शीले जानकारी दिएका छन् । चक्कु प्रहार गर्ने फरार भएका छन् । प्रहरीले फरार व्यक्तिको खोजी सुरु गरेको छ ।
इलाका प्रहरी कार्यालय सिमराका प्रहरी टोलीले घटनास्थललाई नियन्त्रणमा लिएर अनुसन्धान सुरु गरेको छ । प्रहरीले अनुसन्धानका लागि दुई जनालाई नियन्त्रणमा लिएको छ ।
