: भोटेकोशी बाढीपीडितका लागि गोरखाका स्थानीय तहहरुले तीन करोड रुपैयाँ राहत रकम संकलन गरेका छन्। जिल्लाका ११ वटा पालिकाहरुले जनप्रतिनिधि, कर्मचारी तथा शिक्षकहरुबाट रकम संकलन गरेका हुन्। उनीहरुले सो रकम प्रधानमन्त्री दैवी प्रकोप उद्धार कोषमा जम्मा गरेको जनाएका छन्।
सबैभन्दा धेरै गोरखा नगरपालिकाले ५० लाख रुपैयाँ संकलन गरेको छ। जनप्रतिनिधिहरुबाट पाँच लाख, शिक्षक, कर्मचारीहरुबाट ३१ लाख ४० हजार ५८९, नगरपालिकाले नियुक्त गरेको कर्मचारीहरुबाट ११ लाख ३२ हजार ८९० र नगरपालिकाको कोषबाट दुईलाख २६ हजार ५२१ गरी ५० लाख रुपैयाँ संकलन गरिएको नगरपालिकाका इञ्जिनियर प्रकाश ढकालले जानकारी दिए।
त्यस्तै पालुङटार नगरपालिकाबाट ३९ लाख रुपैयाँ संकलन भएको छ । जनप्रतिनिधि, शिक्षक, कर्मचारी तथा नगरपालिका कोषबाट गरी सो राहत रकम संकलन गरिएको नगरपालिकाले जनाएको छ। त्यस्तै भीमसेनथापा गाउँपालिकाबाट ३५ लाख रुपैयाँ र सिरानचोक गाउँपालिकाले ३३ लाख ५० हजार रुपैयाँ संकलन गरेका छन्।
त्यसैगरी सहिदलखन गाउँपालिकाले ३० लाख ७५ हजार रुपैयाँ र बारपाक सुलिकोट गाउँपालिकाले २८ लाख ५९ हजार रुपैयाँ संकलन गरेका छन् । त्यस्तै अजिरकोट गाउँपालिकाले २७ लाख ६६ हजार रुपैयाँ र धार्चे गाउँपालिकाले १५ लाख रुपैयाँ राहत रकम संकलन गरेका छन् । त्यस्तै गण्डकी गाउँपालिकाबाट २० लाख रुपैयाँ, चुमनुब्री गाउँपालिकाबाट १२ लाख २० हजार रुपैयाँ र आरुघाट गाउँपालिकाले ११ लाख ३३ हजार रुपैयाँ राहत रकम संकलन गरेका गाउँपालिकाहरुले जनाएका छन् ।
