: सिरियाको उत्तरी क्षेत्रस्थित अलेप्पो प्रान्तको अल-ऐस सहरमा सोमबार बिहानै शृङ्खलाबद्ध विष्फोट भएका छन्। सिरियाली सरकारी टेलिभिजन 'अल-इखबरिया' लगायत अन्तर्राष्ट्रिय सञ्चारमाध्यमहरूका अनुसार स्थानीय रक्षा मन्त्रालयसँग सम्बद्ध एक हतियार डिपोलाई लक्षित गरी ती विष्फोटहरू भएका हुन्।
विष्फोटबाट भएको मानवीय तथा भौतिक क्षतिको आधिकारिक विवरण आउन बाँकी छ। घटनालगत्तै सम्बन्धित निकायले सो क्षेत्रको अवस्थाबारे थप जानकारी सङ्कलन गरिरहेको जनाइएको छ।
केही स्थानीय स्रोत तथा सञ्चारमाध्यमहरूले उक्त विष्फोट इजरायली हवाई हमलाका कारण भएको आशंका गरेका छन्। लक्षित डिपो टर्की समर्थित समूहका हतियारहरू भण्डारण गर्न प्रयोग हुँदै आएको दाबी समेत गरिएको छ। यद्यपि इजरायली हमला र हतियार डिपोबारे गरिएका यी दाबीहरूको पुष्टि हुन बाँकी छ।
