: नेपाल स्टक एक्सचेञ्ज (नेप्से) मा प्राविधिक समस्याका कारण धितोपत्र कारोबार स्थगित भएपछि नेपाल धितोपत्र बोर्ड (सेबोन) ले पाँच सदस्यीय निरीक्षण टोली खटाएको छ।
बोर्डले नेप्सेको कारोबार अवरुद्ध हुनुको कारण पहिचान गर्न उपकार्यकारी निर्देशकको नेतृत्वमा पाँच सदस्यीय निरीक्षण टोली खटाएको जनाएको छ।
नेपालमा धितोपत्रको दोस्रो बजार सञ्चालन गर्ने नेप्सेबाट आइतबार बिहानदेखि धितोपत्र दलाल व्यवसायीको कारोबारसम्बन्धी सर्भर राखिएको डाटा सेन्टरमा प्राविधिक समस्या आएको जानकारी प्राप्त भएको बोर्डले जनाएको छ। उक्त समस्याका कारण सोमबार कारोबार स्थगित गरिएको थियो।
बोर्डका अनुसार धितोपत्र दलाल व्यवसायीको कार्य गर्ने अनुमतिपत्र प्राप्त ९२ कम्पनीमध्ये ७२ वटा व्यवसायीहरुको सर्भर राखिएको डाटा सेन्टरमा प्राविधिक समस्या आएको हो। यस विषयमा बोर्डको गम्भीर ध्यानाकर्षण भएको जनाउँदै नेप्सेलाई आवश्यक अध्ययन तथा जाँचबुझ गरी यस्ता घटना पुनः दोहोरिन नदिन गर्नुपर्ने सुधारसहितको प्रतिवेदन असोज १२ गतेभित्र पेस गर्न निर्देशन दिइएको छ।
बोर्डले नेप्सेबाट जानकारी प्राप्त हुनासाथ प्राविधिकलगायतका समस्या पहिचान गरी कारोबार सञ्चालनमा अवरोध आउनुको कारण पत्ता लगाउन निरीक्षण टोली खटाएको जनाएको छ।
निरीक्षण टोलीले पेस गर्ने सुझावका आधारमा आगामी दिनमा नेपालको धितोपत्र बजारलाई स्वच्छ,सुरक्षित एवं पारदर्शी बनाउन थप कार्यक्रम अघि बढाइने बोर्डले प्रतिबद्धता जनाएको छ।
