: अमेरिकी राष्ट्रपति डोनाल्ड ट्रम्पले युक्रेन युद्ध अन्त्य गर्न रूस र युक्रेनबीच सहमति हुने समय नजिकिएको दाबी गरेका छन्। ट्रम्पले दुवै पक्षले युद्धबाट आजित भएको भन्दै अब वार्तामार्फत द्वन्द्व अन्त्य हुने बताएका हुन्।
तर, यस्तो निष्कर्षमा ट्रम्प कसरी पुगे भन्ने स्पष्ट छैन। पछिल्लो समय पनि रूस र युक्रेनले एकअर्काको भूभागभित्र गहिराइसम्म क्षेप्यास्त्र तथा ड्रोन आक्रमण गरिरहेका छन्।
ट्रम्पले गत वर्ष आफ्नो कार्यकाल सुरु भएयता युक्रेन युद्ध अन्त्य हुने विषयमा पटक-पटक यस्तै दाबी गर्दै आएका छन्। अप्रिल र मे महिनामा ह्वाइट हाउसका अधिकारी तथा संयुक्त राष्ट्रसंघका लागि अमेरिकी राजदूत माइक वाल्ट्जले समेत केही सातामै युद्धविराम हुन सक्ने बताएका थिए। तर, त्यस्तो युद्धविराम हुन सकेन।
गत वर्षको संयुक्त राष्ट्रसंघ महासभामा ट्रम्पले सबैलाई आश्चर्यमा पार्दै रूसलाई ‘कागजी बाघ’को संज्ञा दिएका थिए। त्यतिबेला उनले युक्रेनले रूसको कब्जामा रहेको आफ्नो सम्पूर्ण भूभाग फिर्ता लिन सक्ने सम्भावनासमेत रहेको बताएका थिए।
अहिले पनि ट्रम्पको त्यही मूल्यांकन कायम छ कि छैन भन्ने स्पष्ट छैन। तर, ट्रम्पले आजै युक्रेनी राष्ट्रपति भोलोदिमिर जेलेन्स्कीसँग भेटवार्ता गर्दैछन्। त्यसैले ट्रम्पले युद्ध अन्त्यका विषयमा आफू आशावादी हुनुको कारणबारे थप जानकारी दिन्छन् कि दिँदैनन् भन्नेमा विश्वको ध्यान केन्द्रित हुनेछ।
इरानबारे पनि ट्रम्पको चेतावनी
ट्रम्पले इरानसँगको सम्झौता हुने वा नहुने विषयमा आफूले ठूलो निर्णय गर्नुपर्ने बताएका छन्। उनले इरानलाई पुनर्निर्माण गर्न र विगतभन्दा अझ शक्तिशाली देश बन्ने अवसर दिने गरी सम्झौता हुन सक्ने बताएका छन्।
उनले आफूले ‘इस्लामिक गणतन्त्रलाई पूर्ण रूपमा ध्वस्त पार्न’ सक्ने चेतावनी पनि दिएका छन्। उनले इरानलाई फेरि मानिस र अन्य देशलाई क्षति पुर्याउने मौका नदिने बताएका छन्। ‘मलाई लाग्छ, निर्वाचनपछि हामी तत्कालै सम्झौता गर्नेछौं, किनकि उनीहरूका लागि सम्झौता नगर्नुको कुनै अर्थ छैन,’ ट्रम्पले भने।
ट्रम्पले संयुक्त राष्ट्रसंघ सुरक्षा परिषद्लाई आफ्नो ‘२० बुँदे गाजा शान्ति योजना’ र ‘बोर्ड अफ पिस’लाई सर्वसम्मत समर्थन गरेकोमा धन्यवाद दिएका छन्।
उनका अनुसार करिब ३० देश ‘बोर्ड अफ पिस’मा सहभागी भइसकेका छन्। उनले राहतका लागि लाखौँ डलर सहयोग गर्ने सदस्य राष्ट्रहरूप्रति पनि आभार व्यक्त गरेका छन्।
ट्रम्पले अमेरिका रूस र युक्रेनका नेताहरूसँग नजिकबाट काम गरिरहेको बताएका छन्। उनले भने, ‘हामी यो काम पूरा गर्नेछौँ, मानिसहरूले बुझेभन्दा धेरै छिटो।’
