: सप्तकोशी नदीमा शुक्रबार बिहानैदेखि पानीको बहाव निरन्तर बढिरहेको छ। पूर्वी पहाडी जिल्लामा लगातार भइरहेको वर्षाका कारण नदीमा पानीको सतह बढ्दै गएपछि कोशी ब्यारेजका ५६ मध्ये ३३ वटा ढोका खोलिएको छ। सप्तकोशी नदीमा शुक्रबार ४ बजेको माप्न अनुसार पानीको बहाव प्रतिसेकेन्ड २ लाख ५४ हजार ६० क्युसेक पुगेको जिल्ला प्रहरी कार्यालय सुनसरीका निमित्त प्रहरी प्रमुख डिएसपी चन्द्र खड्काले जानकारी दिएका छन्।
सप्तकोशी नदिमा प्रतिसेकेन्ड १ लाख ५० हजार क्युसेकभन्दा बढी पानीको बहावलाई खतरा मानिने भएकाले नदी आसपासका क्षेत्रमा उच्च सतर्कता अपनाइएको प्रहरीले जनाएको छ। नदीमा पानीको बहाव उच्च भएपछि कोशी ब्यारेजमा खतराको संकेतस्वरूप रातो बत्तीसमेत बालिएको छ।पानीको बहाव निरन्तर बढ्दै गए पनि ब्यारेजका सबै ढोका नखोलिएको भन्दै नदी तटीय क्षेत्रका बासिन्दा त्रसित बनेका छन्। श्रीलंका टापुका स्थानीय सन्तोष चन्द्रबंशीले सप्तकोशीमा पानीको बहाव बढ्दै गएकाले आसपासका बस्तीका नागरिकमा त्रास बढेको बताए।उनले तत्काल कोशी ब्यारेजका ५६ ढोका खोलेर नदि तटिय क्षेत्रका नगारिकको सुर
बिही ब्यवस्था मिलाउन माग गरेका छन् ।
बिहिबारदेखि देशभर वर्षा भइरहेको छ। पूर्वी पहाडी क्षेत्रमा समेत निरन्तर वर्षा भइरहेकाले सप्तकोशी नदीमा पानीको बहाव अझ बढ्न सक्ने भन्दै प्रहरीले नदी आसपासका बासिन्दालाई सतर्क रहन आग्रह गरेको छ। जिल्ला प्रहरी कार्यालय सुनसरीका प्रहरी निरीक्षक हेमराज ओलीले सप्तकोशी नदी आसपासका क्षेत्रमा बसोबास गर्ने नागरिकलाई सम्भावित जोखिमलाई ध्यानमा राख्दै सुरक्षित स्थानमा रहन आग्रह गरिएको बताए।उनका अनुसार नदीको बहाव बढ्दै गएकाले सम्भावित बाढी तथा अन्य घटनालाई मध्यनजर गर्दै नदी आसपासका क्षेत्रमा सुरक्षा निगरानी बढाइएको छ।
सुनसरीको बराहक्षेत्र नगरपालिका र कोशी गाउँपालिकाअन्तर्गत सप्तकोशी नदी आसपासका क्षेत्रमा नागरिकको सुरक्षाका लागि प्रहरीको उद्धार टोलीसमेत परिचालन गरिएको प्रहरी निरीक्षक ओलीले बताए।
उद्धार टोलीलाई आवश्यक परेको अवस्थामा तत्काल उद्धार तथा सहयोग गर्न सक्ने गरी तयारी अवस्थामा राखिएको ओलीले बताए। लगातारको वर्षाका कारण नदीमा पानीको सतह र बहाव थप बढ्न सक्ने भएकाले नदी किनार, तटीय बस्ती तथा जोखिमयुक्त क्षेत्रमा बसोबास गर्ने नागरिकलाई अनावश्यक रूपमा नदी आसपास नजान र सुरक्षित रहन प्रहरीले आग्रह गरेको छ।
सप्तकोशीमा पानीको बहाव बढेसँगै कोशी ब्यारेजबाट पूर्व–पश्चिम चल्ने सवारीसाधन सञ्चालनमा समेत सतर्कता अपनाइएको छ। ब्यारेज क्षेत्रमा पानीको अवस्था र सम्भावित जोखिमलाई ध्यानमा राख्दै सुरक्षा निकायले निगरानी बढाएका छन्। सप्तकोशीमा शुक्रबार बिहानैदेखि पानीको बहाव क्रमिक रूपमा बढिरहेको र पूर्वी पहाडी क्षेत्रमा वर्षा जारी रहेकाले नदीमा पानीको बहाव अझ बढ्न सक्ने आकलन गरिएको छ। त्यसलाई मध्यनजर गर्दै नदी तटीय क्षेत्रका बासिन्दालाई सचेत र सुरक्षित रहन आग्रह गरिएको प्रहरीले जनाएको छ।
