: बाराको कोल्हबीमा शुक्रबार करेन्ट लागेर एक बालकको मृत्यु भएको छ । घटनामा चारजना घाइते भएका छन् । जिल्ला प्रहरी कार्यालय बाराका अनुसार कोल्हबी नगरपालिका-३ जुगुवाका १० वर्षीय बालक आकाश रामको मृत्यु भएको हो । उनलाई टीभी चलाउन खोज्दा तार सर्ट भएर करेन्ट लागेको हो ।
बालकलाई तत्कालै अस्पताल लगिए पनि चिकित्सकले मृत घोषणा गरेका थिए । बालकलाई करेन्ट लागेको अवस्थामा छुट्याउन गएका अन्य चारजना घाइते भएका छन् ।
घाइते हुनेमा बालककी हजुरआमा ७० वर्षीया एतबरिया राम, मृतककी दिदी १२ वर्षीया निलम राम, स्थानीय फुलकुमारी राम र ४१ वर्षीय अनिता शर्मा रहेको बाराका प्रहरी प्रवक्ता एवम् प्रहरी नायब उपरीक्षक मिनबहादुर घलेले जानकारी दिए ।
घाइतेको कोल्हबीस्थित तामागढी अस्पतालमा उपचार भइरहेको छ ।
