: काभ्रेको धुलिखेलमा डाँफे खोलाले बगाउँदा एक जनाको मृत्यु भएको छ । मृत्यु हुनेमा धुलिखेल नगरपालिका–९ ठुलीटारका ५७ वर्षीय हिरालाल गौतम रहेका छन् ।
आज बिहान करिब ९ बजे धुलिखेल–९ कल्छेस्थित डाँफे खोलाले गौतमलाई बगाएको खबर प्रहरीलाई प्राप्त भएको थियो ।
खबर पाउनासाथ खटिएको प्रहरी टोलीले खोजी गर्ने क्रममा बगाएको स्थानबाट करिब १.५ किलोमिटर तल धुलिखेल नगरपालिका–११ स्थित डाँफे खोलाको बगरछेउमा गौतमलाई मृत अवस्थामा फेला पारेको जिल्ला प्रहरी कार्यालयका डिएसपी रबिन बिष्टले जानकारी दिए ।
घटनाबारे जानकारी प्राप्त भएपछि प्रहरी टोलीले घटनास्थलमा पुगेर आवश्यक अनुसन्धान तथा कानुनी प्रक्रिया अघि बढाएको छ । मृतक गौतमको शव परीक्षण (पोष्टमार्टम) का लागि धुलिखेल अस्पताल ल्याउने तयारी भइरहेको डिएसपी बिष्टले बताए ।
