। प्रिमियर लिगका अधिकांश आर्थिक आरोपमा म्यान्चेस्टर सिटी दोषी ठहरिएपछि अन्य क्लबहरूले क्षतिपूर्तिको दाबी गर्ने सम्भावनाबारे कानुनी परामर्श लिन थालेका छन् । बीबीसी स्पोर्टका अनुसार स्वतन्त्र प्यानलले निर्णय गरिसकेको भए पनि सिटीमाथि लाग्ने सजाय भने अझै तय भएको छैन ।
बीबीसीका अनुसार सिटीविरुद्ध लगाइएका ११५ आर्थिक आरोपमध्ये अधिकांशलाई प्यानलले सदर गरेको छ । द एथलेटिकले ११५ मध्ये ११४ आरोप कायम रहेको जनाएको छ । तर प्रिमियर लिगले अहिलेसम्म आधिकारिक घोषणा गरेको छैन ।
सजायका रूपमा अंक कटौती, प्रिमियर लिगबाट निष्कासन वा ठूलो आर्थिक जरिवाना हुन सक्ने चर्चा छ । यद्यपी यीमध्ये कुन सजाय लाग्ने भन्ने निर्णयका लागि छुट्टै सुनुवाइ हुने भएकाले अन्तिम फैसला आउन अझ केही महिना लाग्न सक्छ ।
बीबीसीका अनुसार केही प्रिमियर लिग क्लबहरूले सिटीका आर्थिक नियम उल्लंघनबाट आफूहरू प्रभावित भएको दाबी गर्दै क्षतिपूर्तिको आधारबारे कानुनी राय लिन सुरु गरेका छन् ।
एक पूर्व वरिष्ठ क्लब अधिकारीले विभिन्न क्लबले व्यक्तिगत रूपमा क्षतिपूर्ति दाबी गर्ने अपेक्षा व्यक्त गरेका छन् भने अर्का एक कानुनविद्ले प्रिमियर लिगले सामूहिक रूपमा पनि प्रक्रिया सञ्चालन गर्न सक्ने बताएका छन् ।
यसअघि नाफा तथा दिगोपन नियम (पीएसआर) उल्लंघन गरेको मुद्दामा एभर्टनले बर्नलीलाई ३५ मिलियन पाउन्ड क्षतिपूर्ति तिर्न आदेश दिइएको उदाहरण पनि यस बहससँग जोडिएको छ ।
म्यान्चेस्टर सिटीले दोषी ठहर भएको विषयमा प्रत्यक्ष प्रतिक्रिया नदिइिन प्रिमियर लिगको प्रक्रिया अझै गोपनीय र जारी रहेको जनाएको छ । क्लबले सन् २०२३ मा सार्वजनिक गरेको आफ्नो धारणा यथावत् रहेको दोहोर्याएक छ ।
बीबीसीका अनुसार यदि अन्तिम निर्णय क्लबविरुद्ध आएमा म्यानचेस्टर सिटीले त्यसविरुद्ध अपिल गर्ने तयारी गरिरहेको छ । अपिल प्रक्रियाले यो मुद्दाको अन्तिम टुंगो लाग्न अझ समय लाग्न सक्ने देखिएको छ ।
-बीबीसीबाट
