। जिल्ला प्रहरी परिसर काठमाडौंले चाडपर्वलक्षित विशेष सुरक्षा योजना २०८३ लागू गरेको छ ।
परिसरको कार्यालय भद्रकालीमा पत्रकार सम्मलेन गर्दै काठमाडौंका एसएसपी दीलिप घिमिरेले विशेष सुरक्षा योजना आजैबाट लागू भएको बताए । सुरक्षा योजना डेढ महिना अर्थात ३० कात्तिकसम्म जारी रहने बताइएको छ ।
दसैं, तिहार तथा छठमा हुनसक्ने अपराधजन्य कार्यलाई रोकथाम तथा न्यूनिकरण गर्न भन्दै प्रहरीले विशेष योजना लागू गरेको छ । चाडपर्वमा पटका, अतिसबाजी, आगलागी, मदिरा सेवनपछि सवारी दुर्घटना, नक्कली टिकट, यात्रु ठगी, चोरी, पाकेटमारी, जुवातास, लंगुरबुर्जा जस्ता गतिविधि हुनसक्ने औंल्याइएको छ ।
त्यस्तै पेय पदार्थमा नसालु पदार्थ मिसाउने, नक्कली नोटको कारोबार, हत्या लगायतको घटना पनि हुनसक्ने जोखिम रहेको प्रहरीको विश्लेषण छ । यिनै आपराधिक गतिविधि रोक्न र नागरिक सुरक्षा प्रत्याभूति दिलाउन विशेष सुरक्षा योजना लागू गरिएको परिसरका एसपी तथा प्रवक्ता दानबहादुर थापा बताउँछन् ।
३ हजार बढी प्रहरी परिचालन
चाडबाडमा हुनसक्ने यस्ता आपराधिक गतिविधि रोक्नका लागि काठमाडौं परिसरले ३ हजार ५०६ प्रहरी परिचालन गर्ने भएको छ । सादा पोशाकदेखि युनिफर्मसम्म गरेर ३ हजार ५०६ प्रहरी परिचालन हुनेछन् । जसमा तालुक कार्यालयबाट थप मतको रुपमा १९० जना परिचालन हुने बताइएको छ ।
प्रहरीहरू बढी संवेदनशील तथा जोखिम रहेका क्षेत्रहरू मठ मन्दिर तथा धार्मिक स्थलहरू, न्यूरोड, असन जस्ता व्यापारिक र भीडभाड हुने क्षेत्रहरूमा, यातायाताको काउन्टर भएका ठाउँहरू, बजार क्षेत्र तथा बैंक तथा वित्तिय क्षेत्रहरू जस्ता ठाउँहरूमा प्रहरी ठूलो मात्रामा परिचालन गरिने बताइएको छ ।
ड्रोन र कुकरको सहयोगमा निगरानी
चाडपर्वलक्षित सुरक्षा योजनामा ड्रोनदेखि कुकुरसम्म परिचालन गरिने बताइएको छ । नाकाहरूमा तालिमप्राप्त कुकुरहरू परिचालन गरी स्नीफिङ गराउनेसम्मको काम हुने बताइएको छ ।
विशेषगरी यस्ता कुकुरहरूले बिस्फोटक पदार्थ पहिचानमा सहयोग गर्नेछन् । त्यस्तै ड्रोनबाट निगरानी पनि हुनेछ । त्यसका लागि ३ वटा ड्रोन परिसर काठमाडौंमा आइसकेको बताइएको छ ।
‘ड्रोनदेखि कुकुरसम्म परिचालन गरेर काठमाडौं सुरक्षित बनाउने हाम्रो प्रयास हुनेछ’ पत्रकार सम्मलेनमा बोल्दै एसएसपी घिमिरेले भने ।
त्यसैगरी १ हजार २४२ स्थानमा राखिएका सीसीक्यामेराबाट पनि निगरानी हुने बताइएको छ । सोस मिडिया मनिटरिङ पनि गरिने बताइएको छ । काठमाडौंका १० स्थानमा सुरक्षाको अत्याकवश्यक जानकारी दिनका लागि पब्लिक अनान्समेन्ट सिस्टम पनि राखिनेछ ।
पीपीआई मोडल
चाडपर्व लक्षित विशेष सुरक्षा योजनामा काठमाडौं प्रहरीले पीपीआई मोडल लागू गरेको छ । जसमा प्रोमोशनल, प्रिभेन्टीभ, इन्सफोर्समेन्ट, इन्नोभेशन छन् । प्रोमोशनलमा जनचेतनामुलक कार्यक्रम सञ्चालन गरिनेछ । जसमा मिडिया, सामाजिक सञ्जाल तथा समुदायमार्फत सुरक्षा सन्देश प्रवाह गरी नागरिकलाई सचेतना अभिवृद्धि गरिने बताइएको छ ।
प्रिभेन्टिभ अन्तर्गत सम्भावित अपराध तथा जोखिम पहिचान गरी अग्रिम तयारी गर्ने, गस्ती, निगरानी, चेकजाँच, तथा संवेदशनशील स्थानहरूमा प्रहरीको उपस्थिती सुदृढ बनाइ अपराध हुन नदिन उपाय अबलम्बन गर्ने बताइएको छ ।
इन्फोर्समेन्टमा कानून विपरित क्रियाकलापमा संलग्न व्यक्तिहरूलाई तत्काल नियन्त्रणमा लिई कानून बमोजिम कारबाही गर्ने बताइएको छ ।
इन्नोभेशनमा भने प्रविधिको अधिक प्रयोग गरी प्रभाकारी सुरक्षा व्यवस्था मिलाउने दाबी छ ।
मोबाइल गस्तीदेखि स्ट्राइकिङसम्म
मोबाइल गस्तीदेखि स्ट्राइकसम्मका गस्ती तथा चेकिङ गरिने प्रहरीले बताएको छ । ९८ स्थानमा एरिया कभरको काम हुने बताइएको छ । १६६ वटा मोबाइल गस्ती परिचालन हुनेछन् ।
५०८ स्थानमा पिकेट हुनेछ । २१० पैदल गस्ती टोली खटिनेछन् । मोटरसाइकल क्युआरटी (क्वीक रेस्पोन्स टिम) १५२ वटा परिचालन हुनेछन् । गाडीसहितको क्युआरटी १४० वटा हुनेछन् । १४० स्थानमा कर्डन सर्चको काम हुनेछ ।
७० सादा पोशाकको टिम परिचालन हुनेछन् । १३३ स्थानमा चेकप्वाइन्ट हुनेछ । ८० मन्दिरहरूमा प्रहरीको विशेष सुरक्षा हुने बताइएको छ । १४८ टिकट काउन्छरमा पनि विशेष निगरानी हुने बताइएको छ ।
यसरी प्रहरीले स्ट्राइकिङदेखि रिभर्स, सिआरभी, पैदल गस्ती, ट्राफिकसहितको संयुक्त चेकिङ गरी सुरक्षा व्यवस्था मिलाउने बताएको छ ।
१२ स्थानमा नागरिक सहायता कक्ष
परिसर काठमाडौंले विभिन्न १२ स्थानहरूमा नागरिक सहायता कक्ष स्थापना गर्ने भएको छ । बालाजुबाट आजै यसको सुरुवात गरिएको छ ।
कलंकी, बल्खु, कोटेश्वर, जडिबुटी, गौशाला, चाबहिल चोक, गोंगबु बसपार्क, बिजी मल अगाडि, सितपाइला जोरपाटी, बालाजु बाइपास, बालाजु चोक, सुरुङमार्ग नागढुंगा लगायतका क्षेत्रहरूमा नागरिक तथा यात्रु सहायता कक्ष स्थापना गरेर काम अघि बढाइनेछ ।
