: फ्लाईदुबई विमानमा सह-पाइलटले आक्रमण गरेपछि बहादुरीपूर्वक ककपिटको ढोका खोलेर यात्रुहरूको ज्यान बचाएका भारतीय पाइलट क्याप्टेन स्मित मच्छर र इजरायली प्रधानमन्त्री बेन्जामिन नेतान्याहुबीच टेलिफोन वार्ता भएको छ।
कुराकानीका क्रममा प्रधानमन्त्री नेतान्याहुले क्याप्टेन स्मितको अदम्य साहसको उच्च प्रशंसा गर्दै उनलाई भारत, इजरायल र सम्पूर्ण विश्वकै 'हिरो' को संज्ञा दिएका छन्। इजरायली प्रधानमन्त्री कार्यालयले दुवैजनाबीच भएको उक्त संवादको भिडियोसमेत सार्वजनिक गरेको छ।
टेलिफोन वार्तामा घटनाबारे स्मरण गर्दै क्याप्टेन स्मितले भने, 'उडान सामान्य रूपमा भइरहेको थियो। सह-पाइलटले प्रार्थना गर्ने इच्छा देखाएपछि म अगाडि हेरिरहेको थिएँ। तर अचानक ४-५ मिनेटपछि मेरो टाउकाको पछाडि जोरदार प्रहार भयो।'
सुरुमा विमानमा कुनै यान्त्रिक समस्या आएको ठानेका स्मितले लगातार आक्रमण भएपछि सह-पाइलटले नै आफूमाथि प्रहार गरिरहेको थाहा पाएका थिए। आक्रमणबाट गम्भीर घाइते भएका उनको आँखा धमिलो हुँदै गएको थियो भने विमान तीव्र गतिमा तल खसिरहेको थियो।
सह-पाइलटले ककपिटको ढोका भित्रबाट बन्द गरेर बाहिरका मानिसहरूलाई भित्र पस्न नदिएपछि स्मित भुइँमा ढलेका थिए। 'मलाई हावाको गति, विमानको आवाज र यात्रुहरूको चीत्कार सुनिरहेको थियो। मसँग अन्तिम प्रयास गर्ने मात्र शक्ति बाँकी थियो। मैले सोचेँ— यदि मैले यो प्रयास नगरेको भए, म मर्ने थिएँ,' स्मितले भने, 'त्यसपछि मैले आफ्नो सम्पूर्ण शक्ति लगाएर ढोकाको नब घुमाई ढोका खोलिदिएँ।'ढोका खुल्नासाथ बाहिर पर्खिरहेका यात्रु तथा क्रू सदस्यहरू भित्र पसेर स्थिति नियन्त्रणमा लिएका थिए।
इजरायल भ्रमणको निमन्त्रणा
क्याप्टेन स्मितको साहसिक कार्यको प्रशंसा गर्दै प्रधानमन्त्री नेतान्याहुले उनको शीघ्र स्वास्थ्य लाभको कामना गरे। साथै, आगामी इजरायली स्वतन्त्रता दिवसका अवसरमा आयोजना हुने विशेष समारोहको लागि उनले क्याप्टेन स्मित र भारतीय प्रधानमन्त्री नरेन्द्र मोदीलाई इजरायल भ्रमणको निमन्त्रणा समेत दिएका छन्।
