: लेन्देखोलाबाट रसुवागढी हुँदै त्रिशूली नदीमा मिसिएको अकल्पनीय बाढीले नुवाकोटमा कटान गरेको शुभघाटस्थित भित्तामा नयाँ ट्र्याक खन्ने कार्य धमाधम भइरहेको छ। दैनिक रूपमा हेभि इक्युपमेन्टमार्फत नयाँ ट्र्याक खन्ने कार्य भइरहेको छ।
त्रिदेशीय मार्गअन्तर्गत ढुंगे–शुभघाट–बेत्रावती सडकमार्गको सातविसे क्षेत्रमा तीन सातादेखिको निरन्तर नयाँ ट्र्याक खन्ने कार्य सकिएसँगै पासाङल्हामु मार्ग जोडिएको हो।
अब गल्छी–मैलुङ सडकखण्डको गेर्खुनजिकै शुभघाटमा सडक सुचारूको लागि मर्मत कार्य भइरहेको बिदुर नगरपालिका–१० का वडाध्यक्ष गणेशकुमार नेपालको भनाइ छ।
उनका अनुसार शुभघाटमा कटान गरेको स्थानमा नयां ट्र्याक खोलेपछि नुवाकोट–रसुवा आवतजावतमा सहजता आउनेछ। हाल भने बाढीले क्षति पुर्याएको सडक अस्थायी रूपमा विदुरदेखि बेत्रावतीसम्म पुग्न विदुर–१० को कार्यालय हुँदै जान सकिने वडाध्यक्ष नेपालको भनाइ छ।
गत भदौ १० गते बुधबार बिहान १० बजेको अकल्पनीय बाढीपछि अवरुद्ध बनेको सडकखण्ड सुचारु गर्न शुभघाटमा दैनिक तीन थान स्काभेटर परिचालन गरिएका छन्। उक्त स्थानमा नयाँ ट्र्याक खुलेपछि बेत्रावती (नुवाकोट) हुँदै नुवाकोट हुँदै रसुवा आउजाउ गर्ने यात्रुहरूलाई सहज हुनेछ।
