अन्तर्राष्ट्रिय मान्यता प्राप्त यमन सरकारको सेनाले हुथी विद्रोहीको नियन्त्रणमा रहेको राजधानी साना फिर्ता लिन ‘रणनीतिक’ सैन्य कारबाही सुरु गरेको जनाएको छ ।
यमनी सेनाका ब्रिगेडियर जनरल माजिद अल–नुजाइलीले सामाजिक सञ्जाल एक्समा पोस्ट गर्दै भने, ‘हाम्रा सशस्त्र सेनाले सानामा रणनीतिक आक्रमण अभियान सुरु गरेका छन् ।’
उनले रणनीतिक आक्रमणका क्रममा आधुनिक सैन्य क्षमताको प्रयोग भइरहेको पनि बताए ।
हुथीसम्बद्ध अल–मसिराह नेटवर्कले टेलिग्राममा साउदी अरबले सानामा आक्रमण गरेको जनाएको छ ।
यसअघि अल–नुजाइलीले यमनी सेनाले बाब अल–मन्देब जलडमरूमध्यलाई ‘नियन्त्रणमा लिन सफल भएको’ र ताइज प्रान्तको तटीय सहर धुबाबमा रहेको नजिकैको विमानस्थल पनि पुन: कब्जामा लिएको बताएका थिए ।
