: नेपाली कांग्रेसका वरिष्ठ उपसभापति विश्वप्रकाश शर्माले सभापति गगन कुमार थापा र आफूले कुनै पनि निश्चित उम्मेदवारलाई भोट हाल्नका लागि कसैलाई निर्देशन वा दबाब नदिएको बताएका छन् ।
गृहजिल्ला झापा क्षेत्र नम्बर १ का महाधिवेशन प्रतिनिधिहरूसँग आज बिहान भएको भेटघाट कार्यक्रममा बोल्दै वरिष्ठ उपसभापति शर्माले महाधिवेशन प्रतिनिधि तथा मतदाताहरूले आफ्नो स्वविवेक प्रयोग गरेर सक्षम नेतृत्व चयन गर्ने विश्वास व्यक्त गरेका छन् ।
साथै आगामी नेतृत्व चयनमा विशेष महाधिवेशनमा सहभागी नेता-कार्यकर्ताका साथै पछि जोडिएका साथीहरूलाई पनि पदाधिकारी तथा केन्द्रीय समितिमा समेट्नुपर्नेमा जोड दिए। महाधिवेशन कुनै विशेष पक्षधरको मात्र नभई सिंगो नेपाली कांग्रेसको साझा थलो भएको उनले बताए।
'नेतृत्व चयनका क्रममा निर्वाचित भएर आउनेहरूमा विशेष महाधिवेशनमा सहभागी साथीहरू मात्र नभई पछि जोडिनुभएका साथीहरू पनि पदाधिकारी र केन्द्रीय सदस्यमा पर्नुपर्छ,' शर्माले भने,'यो महाधिवेशन कुनै एउटा पक्षको मात्र नभएर सिंगो कांग्रेसको हो।'
