। रसुवाको भोटेकोशी बाढीको क्षतिबारे बागमती प्रदेश सरकारले तयार पारेको एकीकृत प्रारम्भिक प्रतिवेदन मुख्यमन्त्री किरण थापामगरलाई बुझाइएको छ । प्रदेश सरकारको आन्तरिक मामिला, कानु तथा सहकारी मन्त्रालयका सचिव महेश भट्टराईले बिहीबार सो प्रतिवेदन मुख्यमन्त्री थापामगरलाई बुझाएका हुन् ।
प्रतिवेदनमा बाढीका कारण हालसम्म एक हजार ४५५ जनाको ज्यान गइसकेको उल्लेख छ । यस्तै, हालसम्म ५ हजार २८५ जना अझै बेपत्ता छन् ।
घाइते भएकामध्ये ३४४ जनाको विभिन्न अस्पतालहरूमा उपचार भइरहेको छ ।
बाढीबाट २ हजार ३०० वटा निजी आवासमा पूर्ण रूपमा क्षति पुगेको र २६९ वटा घरमा आंशिक क्षति पुगेको प्रतिवेदनमा उल्लेख छ । जसमा दुई हजार ३०० भन्दा बढी परिवार पूर्ण रूपमा विस्थापित बनेका छन् ।
विस्थापितमध्ये एक हजार ८५ जना नागरिकलाई हाल अस्थायी शिविरहरूमा राखिएको प्रतिवेदनमा उल्लेख छ ।
यस्तै, बाढीका कारण १०२ जना बालबालिकाले आफ्ना बाबुआमा गुमाएको प्रतिवेदनमा उल्लेख छ । २४६ बालबालिका र १६९ ज्येष्ठ नागरिक होल्डिङ सेन्टरहरूमा आश्रय लिइरहेको प्रतिवेदनमा उल्लेख छ ।
सार्वजनिक सम्पत्ति क्षति
प्रदेश सरकारले तयार पारेको प्रारम्भिक प्रतिवेदनमा ३४ वटा मोटरेबल पुल र ५१ वटा झोलुङ्गे पुलमा बाढीले पूर्णरूपमा क्षति पुर्याएको छ ।
यस्तै, साढे तीन किलोमिटर कालोपत्रे सडक र १४ वटा सरकारी भवन ध्वस्त भएको प्रतिवेदनमा उल्लेख छ ।
सडक, पुल र सरकारी भवनतर्फ ५ अर्ब ६९ करोड ७ लाख रुपैयाँ बराबरको क्षति पुगेको प्रतिवेदनमा अनुमान गरिएको छ ।
यस्तै, १२ वटा विद्यालयका ३५ भवन र ३१७ कक्षाकोठा पूर्ण रूपमा भत्किँदा ९ हजार २४८ विद्यार्थीको पठनपाठन ठप्प भएको प्रतिवेदनमा उल्लेख छ । यस्तै, १८ वटा विद्यालयमा आंशिक क्षति पुगेको भनिएको छ ।
जसमा ४ अर्ब ९८ करोड ६२ लाख रुपैयाँ बराबरको क्षति पुगेको प्रतिवेदनमा अनुमान गरिएको छ ।
यस्तै, ६ सरकारी र ७ निजी स्वास्थ्य संस्था तथा औषधि पसल पूर्ण रूपमा क्षति पुगेको प्रतिवेदनमा उल्लेख छ ।
खानेपानी र सिँचाइतर्फ ५५ वटा खानेपानी आयोजना र ४४ वटा सिँचाइ कुलोमा क्षति पुग्दा हजारौँ घरधुरी खानेपानी र सिँचाइ सुविधाबाट वञ्चित भएको प्रतिवेदनमा उल्लेख छ ।
यी आयोजनाहरूमा ५२ करोड ६९ लाख रुपैयाँ बराबर क्षति पुगेको प्रतिवेदनमा उल्लेख छ ।
यस्तै, १९८ वटा सञ्चार टावरमा क्षति पुगेकोमा १९३ टावर पुन: सञ्चालनमा ल्याइएको प्रतिवेदनमा उल्लेख छ ।
१७ बैङ्क शाखा र ९ एटीएममा क्षति पुग्दा २ हजार १२५ कर्जा खाता जोखिममा परेको प्रतिवेदनमा उल्लेख छ ।
उद्योग, व्यापार र कृषि क्षेत्र धराशायी
यस्तै, बाढीले उद्योग– व्यवसायमा पनि ठूलो क्षति पुगेको प्रतिवेदनमा उल्लेख छ । जसमा ३०० वटा घरेलु तथा साना उद्योग, ६७ वटा व्यापारिक पसल र ३० वटा गोदाम क्षतिग्रस्त हुँदा दुई अर्ब ९७ करोडभन्दा बढीको क्षति भएको छ र एक हजार ७०० भन्दा बढी श्रमिकको रोजगारी गुमेको प्रतिवेदनमा उल्लेख छ ।
यस्तै, ९७३ हेक्टर खेतीयोग्य जमिन प्रभावित भएको र ४७१ हेक्टरको बालीनाली पूर्ण नष्ट भएको भनिएको छ ।
यस्तै, बाढीमा ७०२ वटा ठूला पशु, २ हजार १२३ वटा साना पशु र एक लाख ३४ हजार कुखुरा तथा पन्छी मरेको प्रतिवेदनमा उल्लेख छ ।
कृषि तथा पशुधनतर्फ २८ करोड ५९ लाख रुपैयाँ बराबरको क्षति पुगेको प्रतिवेदनमा अनुमान गरिएको छ ।
