: सुर्खेतको वीरेन्द्रनगरमा मोटरसाइकलको ठक्करबाट घाइते भएका एक पैदलयात्रीको मृत्यू भएको छ। मृत्यु हुनेमा दैलेखको भैरवी गाउँपालिका–१ घर भई हाल वीरेन्द्रनगर–१०, बुदबुदेमा बस्दै आएका ३७ वर्षीय विवेक थापा रहेका छन्। घुस्राबाट तीनकुने चोकतर्फ जाँदै गरेको लु ७२ प २००९ नम्बरको बुलेट मोटरसाइकलले पैदलयात्री दम्पतीलाई ठक्कर दिएको प्रहरीले जनाएको छ।
प्रहरीका अनुसार टाउकोमा गम्भीर चोट लागेका थापालाई प्रारम्भिक उपचारका लागि कर्णाली प्रदेश अस्पताल कालागाउँ लगिएको थियो। थप उपचारका लागि नेपालगञ्ज लैजाने क्रममा गएराति ९ः५० बजे बाटोमै उनको मृत्यु भएको हो। दुर्घटनामा थापाकी २९ वर्षीया श्रीमती सुनिता थापा र मोटरसाइकल चालक वीरेन्द्रनगर–१० निवासी २२ वर्षीय दिपेश चौधरी घाइते भएका छन्। दुवैको अवस्था मध्यम रहेको प्रहरीले जनाएको छ। चालक चौधरीलाई थप उपचारका लागि नेपालगञ्ज पठाइएको छ।
मृतकका आफन्त तथा स्थानीयले उचित क्षतिपूर्ति र कारबाहीको माग गर्दै वीरेन्द्रनगरको एयरपोर्ट चोकमा टायर बालेर सडक अवरुद्ध गरेका छन्।
दुर्घटनामा संलग्न मोटरसाइकललाई प्रहरीले नियन्त्रणमा लिएको छ। थापाको मृत्यु भएपछि आक्रोशित बनेका आफन्त तथा स्थानीयले उचित क्षतिपूर्ति उपलब्ध गराउन र घटनामा संलग्नमाथि कारबाही गर्न माग गरेका छन्। प्रदर्शनकारीले एयरपोर्ट चोकमा टायर बालेर सडक अवरुद्ध गरेपछि उक्त क्षेत्रको आवागमन पूर्ण रूपमा ठप्प भएको छ। अवस्था सामान्य बनाउन प्रहरीले सुरक्षाकर्मी परिचालन गरेको छ। घटनाबारे थप अनुसन्धान भइरहेको प्रहरीले जनाएको छ।
