: पिकअप भ्यानमा लोड गरिएको तरकारीभित्र लुकाइएको ५७० किलो गाँजा मोरङमा बरामद भएको छ।
नेपाल–भारत सीमा क्षेत्रनजिकै शनिबार राति सशस्त्र प्रहरीले नियन्त्रणमा लिएको पिकअपमा स्कुस र बन्दाकोबीभित्र गाँजा लुकाएर राखिएको फेला परेको हो। मोरङको जहदा गाउँपालिका–४ रामचोकमा राति करिब ११ बजे शंकास्पद अवस्थामा रहेको प्र १–०१–०० च ७४२२ नम्बरको महेन्द्र पिकअप भ्यान जाँच गर्न खोज्दा चालक गाडी छाडेर भागेका थिए।
सशस्त्र प्रहरी बल नेपाल बोर्डर आउट पोस्ट (बीओपी) नोचाबाट खटिएको टोलीले नियन्त्रणमा लिएको गाडी खानतलासी गर्दा तरकारीको बीचमा लुकाइएका १९ पोका गाँजा फेला परेको सशस्त्र प्रहरी बल मोरङका प्रमुख एसपी गेहेन्द्रबहादुर भण्डारीले जानकारी दिए। तौल गर्दा गाँजा ५७० किलो रहेको पुष्टि भएको उनले बताए।
तरकारी ओसारपसारको आवरणमा गाँजा भारततर्फ लैजान खोजिएको प्रारम्भिक अनुमान छ। यद्यपि, गाँजा कहाँबाट ल्याइएको थियो र यसमा को-को संलग्न छन् भन्ने खुलेको छैन। बरामद गाँजा र पिकअप भ्यानलाई थप अनुसन्धान तथा कानुनी कारबाहीका लागि नेपाल प्रहरीको जिम्मा लगाइएको एसपी भण्डारीले बताए।
फरार चालकको खोजी भइरहेको प्रहरीले जनाएको छ। तरकारीको आडमा ठूलो परिमाणमा गाँजा ओसार्न खोजिएको यो घटनाले सीमा क्षेत्रमा लागूऔषध तस्करीको नयाँ शैलीका बारेमा अनुसन्धान गर्नुपर्ने देखाएको प्रहरी अधिकारीहरू बताउँछन्।
