। नेपाली कांग्रेसले प्रधानमन्त्री बालेन शाहको सीमा विवादबारे विवादित अभिव्यक्तिबारे भारतका लागि प्रस्तावित राजदूतको धारणा माग गरेको छ ।
भारतका लागि प्रस्तावित राजदूत डा. निश्चलनाथ पाण्डेको आज संसदीय सुनुवाइ भएको थियो ।
सो क्रममा कांग्रेस सांसद आनन्दप्रसाद ढुंगानाले प्रश्न गरेका छन्, ‘प्रधानमन्त्रीले नै नेपालले पनि भारतको भूमि मिचेको छ भन्नुभयो । त्यसपछि सुस्तामा नेपाली पक्षले बनाउँदै गरेको बाँध भारतीय पक्षले रोकिदियो ।’
हाम्रो सुस्ता फिर्ता गर भनेर सानोबेलादेखि नारा लगाएको स्मरण उनले गरे । ‘तर अझै फिर्ता भएको छैन,’ ढुंगानाले भने।
१७ जेठ २०८३ मा प्रतिनिधि सभाको बैठकमा प्रधानमन्त्री बालेन शाहले नेपाल भारतको सीमा कूटनीतिक छलफलबाट समाधान गर्ने बताएका थिए ।
प्रतिनिधिसभामा सांसदहरूको जवाफ दिने क्रममा उनले यो विषय समाधानका लागि कोसिस भइरहेको उल्लेख गरेका थिए ।
त्यही क्रममा उनले प्रधानमन्त्री भएपछि थाहा पाएको भन्दै भारतले मात्र नभएर नेपालले पनि भारतको जग्गा मिचेको रहेछ भनेका थिए ।
प्रधानमन्त्रीको यस्तो अभिव्यक्तिबारे संसद्मा समेत प्रश्न उठेको थियो । तर प्रधानमन्त्रीले आफैं भने संसद्लाई कुनै जवाफ दिएका थिएनन् ।
