। साउदी अरबका लागि प्रस्तावित राजदूत गिरीबहादुर सुनारले आफूले महिला हिंसा नगरेको दाबी गरेका छन्। संसदीय सुनुवाइ समितिमा परेको उजुरीको विषयमा जवाफ दिनेक्रममा उनले यस्तो बताएका हुन्।
सांसद मधुकुमार चौलागाईंले प्रश्न सोधेका थिए- घरेलु हिंसाका कारण ललितपुर प्रहरी कार्यालयमा पुगेर मिलापत्र गर्नुभएको हो ?
जवाफमा उनले भने- म आफैँ महिलाहिंसाविरुद्धको अभियान्ता हो। महिलाले नो भनेपछि नो भन्ने मान्छे म। यसबारे आर्टिकलहरू लेखेको मान्छे म। शौचालय बन्दा जेन्डर ख्याल गर्नुपर्छ भनेर आर्टिकल लेखेको छु। म दलितका विषयमा पनि लेखिरहने मान्छे हो। १३ वर्षअघिको कुरा। मिलेको कुरालाई आजको दिनमा मिलेको कुरालाई आज निकाल्नु के नियत हो ? हामीबीच प्रेम थियो उहाँ विदेश जानुभयो। हामीबीच लेनदेन थियो- पैसा हैन। उहाँ महिला फौजदारी मुद्दा लागेको महिला हुनुहुन्छ। मविरुद्ध कतै पनि मुद्दा लागेको छैन। अहिलेसम्म मविरुद्ध वारेन्ट जारी भएको छैन। फोनमा भनाभन भएको हो। यसैलाई महिला हिंसा भनिन्छ भने मेरो भन्नु केही छैन।
