: अर्काको नाम र हस्ताक्षर प्रयोग गरी झुट्टा उजुरी दिएको आरोपमा रुकुम पश्चिमको आठबिसकोट नगरपालिका–५ का दिपक पुन मगरलाई २ हजार रुपैयाँ जरिवाना गरिएको छ।
अख्तियार दुरुपयोग अनुसन्धान आयोगका प्रवक्ता सुरेश न्यौपानेका अनुसार रुकुम पश्चिमको आठबिसकोट नगरपालिका-५ निवासी पुन मगरले एबी राई ढआङबाबु राई) को नामबाट नेपाल प्रहरीको प्रहरी नायब महानिरीक्षक (डीआईजी) पदमा रहेको बताउने व्यक्तिविरुद्ध उजुरी दिएका थिए।
सहकारीबाट लिएको ऋणको भुक्तानी माग्दा आफू डीआईजी भएको र उजुरी मिलाइदिने भन्दै ४० लाख रुपैयाँमध्ये १५ लाख रुपैयाँ नगद र कान्छी श्रीमतीको नाममा थप चेक लिएको र धम्की दिँदै रकम माग गरिरहेको आरोप उजुरीमा थियो।
सोही उजुरीका आधारमा अनुसन्धानका क्रममा एबी राईले आफूले उजुरी नदिएको र त्यसमा रहेको हस्ताक्षर पनि आफ्नो नभएको दावी गर्दै सनाखत गरेका थिए।
आयोगका अनुसार दिपक पुन मगरले अनुसन्धानकै क्रममा २०८३ असार १७ गते आयोगसमक्ष बयान दिने क्रममा उक्त उजुरी आफूले नै एबी राईको नामबाट दिएको स्वीकार गरेका थिए।
अनुसन्धानका क्रममा दिपक पुन मगर र आङबाबु राई दुवैले त्यस्तो घटना नभएको, आफूलाई कसैले धम्की नदिएको र मुद्दा मिलाइदिने भन्दै रकम नमागिएको बयान दिएको आयोगले जनाएको छ।
आयोगले आङबाबु राईको नाम र हस्ताक्षर प्रयोग गरी उनलाई दुःख तथा हैरानी दिने बदनियतले झुट्टा उजुरी दिएको तथ्य पुष्टि भएको ठहर गर्दै मगरलाई भ्रष्टाचार निवारण ऐन,२०४८ को दफा ४९ लगायत प्रचलित कानुनबमोजिम २ हजार रुपैयाँ जरिवाना गरेको जनाएको छ।
