। भोटेकोशी नदीमा आएको विनाशकारी बाढीमा बेपत्ता तथा मृत्युवरण गरेका कर्मचारीका परिवारलाई रसुवागढी हाइड्रोपावर कम्पनी लिमिटेडले प्रतिपरिवार ५ लाख रुपैयाँका दरले राहत उपलब्ध गराएको छ ।
कम्पनीले २०८३ भदौ १० गते आएको बाढीका कारण प्रभावित भएका कर्मचारीका परिवारलाई तत्काल आर्थिक सहयोग उपलब्ध गराउने निर्णयअनुसार हालसम्म ५३ जना कर्मचारीका परिवारलाई राहत रकम उपलब्ध गराएको जनाएको छ ।
कम्पनीका अनुसार बाढीमा बेपत्ता तथा मृत्युवरण गरेका कर्मचारीका परिवारलाई लक्षित गरी राहत वितरण गरिएको हो । हालसम्म प्राप्त कागजातका आधारमा वेपत्ता तथा मृतक गरी जम्मा ५३ जना कर्मचारीमध्ये ४७ जना कर्मचारीका परिवार तथा आफन्तलाई प्रति परिवार ५ लाख रुपैयाँका दरले कुल २ करोड ३५ लाख रुपैयाँ उपलब्ध गराएको हो ।
बाँकी प्रभावित परिवारलाई आवश्यक कागजात प्राप्त भएपछि नियमानुसार राहत रकम उपलब्ध गराउने कम्पनीले जनाएको छ ।
रसुवाको टिमुरेमा अवस्थित रसुवागढी जलविद्युत् आयोजनाको स्रोत नदी भोटेकोशीमा आएको बाढीले आयोजनाका अधिकांश संरचनामा क्षति पुर्याएको थियो । बाढीका कारण आयोजनामा कार्यरत नियमित करार सेवातर्फका ५० जना र दैनिक ज्यालादारीतर्फका दुई जना गरी ५२ जना कर्मचारी बेपत्ता भएको कम्पनीको विवरणमा उल्लेख छ । तीमध्ये एक जना कर्मचारीको शव पहिचान भएको जनाइएको छ ।
त्यस्तै, विभिन्न ठेकेदार कम्पनीबाट प्राप्त विवरणअनुसार आयोजनामा कार्यरत ३९ जना कर्मचारी तथा कामदारसमेत बेपत्ता भएका थिए । बाढीपछि आयोजनाको जनशक्ति, संरचना र सञ्चालनमा गम्भीर असर परेको कम्पनीले जनाएको छ ।
कम्पनीले बेपत्ता कर्मचारीका परिवारसँग सम्पर्क तथा संवाद गर्ने र परम्पराअनुसार गरिने काजक्रियामा सहभागी हुने काम प्रारम्भिक दिनमा गर्न नसकेको भन्दै दु:ख व्यक्त गरेको छ ।
आयोजनास्थलसम्म पुग्ने सडक र पुलसमेत बाढीले क्षतिग्रस्त बनाएको छ । नेपाल–चीन सीमाक्षेत्र नजिक रहेको आयोजना स्याफ्रुबेँसीबाट करिब १६ किलोमिटर दूरीमा छ । बाढीका कारण स्याफ्रुबेँसीदेखि आयोजनास्थलसम्म पुग्ने सडक तथा मार्गमा रहेका ६ वटा पक्की पुल पूर्ण रूपमा क्षतिग्रस्त भएको कम्पनीले जनाएको छ ।
हाल रसुवा र नुवाकोट जिल्लासँग सडक सञ्जाल जोडिए पनि क्षतिग्रस्त सडक तथा पुल पुनर्निर्माण नभएसम्म आयोजनास्थलसम्म पुग्ने वैकल्पिक मार्ग उपलब्ध नरहेको कम्पनीको भनाइ छ । सडक र पुल पुनर्निर्माणपछि मात्रै आवश्यक मेसिनरी, उपकरण तथा निर्माण सामग्री आयोजनास्थलसम्म पुर्याउन सकिने र पुनर्निर्माणका गतिविधि अघि बढाउन सहज हुने कम्पनीले जनाएको छ ।
बेपत्ता तथा मृत्युवरण गरेका कर्मचारीका परिवारलाई राहत उपलब्ध गराउनुका अतिरिक्त दुर्घटना बीमा, सामाजिक सुरक्षा कोष तथा कर्मचारी सुविधाअन्तर्गत प्राप्त गर्न सकिने रकमका लागि आवश्यक सहजीकरण गर्ने प्रतिबद्धता पनि कम्पनीले जनाएको छ ।
कम्पनीका अनुसार कर्मचारीको मृत्यु दर्ता प्रमाणपत्र प्राप्त भएपछि नियमअनुसार दुर्घटना बीमा, सामाजिक सुरक्षा कोषमा जम्मा भएको रकम, आश्रित परिवारले प्राप्त गर्न सक्ने पेन्सन तथा किरिया खर्च र सञ्चित बिदाबापतको रकम प्राप्त गर्ने प्रक्रियामा सहयोग गरिनेछ ।
बाढीबाट भएको मानवीय तथा भौतिक क्षति दु:खद र अपूरणीय रहेको उल्लेख गर्दै कम्पनीले पीडित परिवारलाई राहत उपलब्ध गराउने तथा उनीहरूले प्राप्त गर्न सक्ने सुविधा र क्षतिपूर्तिका लागि सम्बन्धित निकायसँग समन्वय गर्ने जनाएको छ ।
