: इक्वेडरको ग्वायाकिल सहरस्थित एक चर्चमा लाइभ स्ट्रिमिङ भइरहेका बेला भयानक दुर्घटना भएको छ। क्याथोलिक पादरी प्याट्रिक अल्फ्रेडो साञ्चेज मोलिनारीको टाउकोमा अचानक काठको ठूलो क्रस (क्रूसीफिक्स) खस्दा घटनास्थलमै मृत्यु भएको छ।
प्राप्त जानकारी अनुसार घटना अक्टोबर १७ का दिन ग्वायाक्विलस्थित 'न्यूस्ट्रा सेनोरा डेल परपेटुआ सोकोरो' चर्चमा भएको हो। पादरी प्याट्रिसियो अल्फ्रेडो सान्चेज मोलिनारी प्रार्थना सभालाई सम्बोधन गरिरहेका थिए। सोही क्रममा भित्तामा झुण्ड्याइएको काठको ठूलो क्रस अचानक उप्किएर सीधै उनको टाउकोमा खसेको थियो। टाउकोमा गम्भीर चोट लागेका कारण उनको घटनास्थलमै मृत्यु भयो।
प्रार्थना सभाको सामाजिक सञ्जालमार्फत प्रत्यक्ष (लाइभ) प्रसारण भइरहेकाले योघटना हजारौँ दर्शकले प्रत्यक्ष रूपमा देखेका थिए। दुर्घटनालगत्तै चर्चमा भागदौड र रुवाबासी चलेको थियो। सम्पूर्ण घटना क्यामेरामा कैद भएको र यसको भिडियो अहिले सामाजिक सञ्जालमा तीव्र रूपमा भाइरल भइरहेको छ।
ग्वायाकिलको आर्कडायोसिसले आइतबार विज्ञप्ति जारी गर्दै शनिबार पादरीको निधन भएको पुष्टि गरेको हो। मोलिनारीले सेन्ट्रल भिकेरियाटअन्तर्गतको आवर लेडी अफ पर्पेचुअल हेल्प चर्चमा पादरीका रूपमा सेवा गरेको उल्लेख छ। संस्थाले उनको परिवार, साथीभाइ र धार्मिक समुदायप्रति समवेदना व्यक्त गरेको छ।
उनी मोस्ट होली रिडिमर धार्मिक समुदायका सदस्य थिए। उनको निधनपछि स्थानीय धार्मिक समुदाय र सामाजिक सञ्जालमा शोक व्यक्त गरिएको छ।
निधनअघि मृत्युकै विषयमा दिँदै थिए प्रवचन
दुर्घटना हुनुअघि पादरी मोलिनारीले प्रार्थना सभामै मृत्युको महत्त्व र ईश्वरको भक्तिबारे सम्बोधन गरिरहेका थिए।
भाइरल भिडियो र सामाजिक सञ्जालका दाबी अनुसार उनका अन्तिम शब्दहरू थिए- 'प्रिय दाजुभाइ तथा दिदीबहिनीहरू, आज यहाँ उपस्थित हामी सबै एक दिन मर्नेछौँ… हामीले अन्य विषय वा काममा बिताउने समय ईश्वरसँग बिताएको समयजस्तो अर्थपूर्ण हुँदैन। ईश्वर, आफ्ना दाजुभाइ-दिदीबहिनी र परिवारलाई दिएको बहुमूल्य समय नै जीवनको सबैभन्दा उत्तम समय हो।'
सम्बोधन लगत्तै घटेको यो अकस्मात र अकल्पनीय घटनाले स्थानीय समुदाय र श्रद्धालुहरूलाई स्तब्ध बनाएको छ। क्रस भित्ताबाट किन खस्यो भन्नेबारे अहिलेसम्म आधिकारिक जानकारी सार्वजनिक भएको छैन। घटनाको कारण र क्रस जडान गरिएको संरचनाको अवस्थाबारे थप विवरण आउन बाँकी छ।
