: महोत्तरीकको बर्दिबास नगरपालिका–३, कालापानीमा ईभी गाडीको ठक्करबाट मोटरसाइकल चालकको मृत्यु भएको छ। अन्य ३ जना घाइते भएका छन्।
भिमानबाट बर्दिबासतर्फ जाँदै गरेको बा. प्र. ०१–००७ ख १७८६ नम्बरको ईभीले विपरीत दिशाबाट आउँदै गरेको प्र –०२–००४ प ८५८५ नम्बरको मोटरसाइकल र बा ९२ प ५५३० नम्बरको स्कुटरलाई ठक्कर दिँदा दुर्घटना भएको हो।
दुर्घटनामा मोटरसाइकल चालक धनुषाको मिथिला नगरपालिका–११ घर भई बर्दिबास–१, गालटार बस्ने ४० वर्षीय सुजनबहादुर मगरको मृत्यु भएको हो। गम्भीर घाइते भएका उनको उपचारका क्रममा मृत्यु भएको प्रहरीले जनाएको छ। मोटरसाइकलमा सवार मगरकी श्रीमती ३५ वर्षीया फुलकुमारी थापा र उनकी तीन वर्षीया छोरी सिसाकुमारी थापा गम्भीर घाइते भएका छन्।
त्यस्तै, स्कुटर चालक सिन्धुलीको दुधौली नगरपालिका–३, ढुंगाटोल बस्ने २४ वर्षीय रमेश चौधरी सामान्य घाइते भएका छन्। घाइतेहरूको बर्दिबासस्थित जनसेवा अस्पतालमा उपचार भइरहेको छ।
दुर्घटनापछि ईभी गाडी सडकबाट करिब १० फिट तल खसेको थियो। ईभीमा सवार यात्रुहरू भने सकुशल रहेका छन्। ईभी चालक भने दुर्घटनापछि फरार रहेका छन्। चालकको खोजी तथा घटनाबारे थप अनुसन्धान भइरहेको छ। ईभीका सहचालक सप्तरीको राजविराज–७ का२२ वर्षीय मिलन साह भने इलाका प्रहरी कार्यालय बर्दिबासको सम्पर्कमा रहेका छन्।
