: अमेरिकी राष्ट्रपति डोनाल्ड ट्रम्पको प्रशासनले आफ्नो दोस्रो कार्यकालमा हालसम्म ३ लाखभन्दा बढी अमेरिकी भिसा रद्द गरेको छ। सङ्घीय सरकारले तीव्र बनाएको अध्यागमन सम्बन्धी कडा नीतिका बीच विदेश मन्त्रालयले मंगलबार यसको जानकारी दिएको हो।
सार्वजनिक गरिएको तथ्यांकले पछिल्ला हप्ताहरूमा भिसा रद्द गर्ने क्रम थप तीव्र बनेको देखाउँछ। यसअघि गत साउन २५ ९अगस्ट १०० मा मन्त्रालयले सन् २०२५ जनवरीमा ट्रम्पको वर्तमान कार्यकाल सुरु भएयता १७५,००० भन्दा बढी भिसा रद्द गरिएको जनाएको थियो।
राष्ट्रपति ट्रम्पले अध्यागमनमा गरिएको कडाइ र देशनिकाला अभियानको उद्देश्य आन्तरिक सुरक्षामा सुधार ल्याउनु रहेको बताएका छन्। तर, अधिकारकर्मीहरूले भने यो कडाइले कानुन अनुसार पाउनुपर्ने उचित प्रक्रिया र अभिव्यक्ति स्वतन्त्रताको हक हनन गरेको आरोप लगाएका छन्।
साथै, यसले विशेष गरी अल्पसङ्ख्यक समुदायका लागि असुरक्षित वातावरण सिर्जना गरेको र उनीहरूमाथि नश्लीय व्यवहार (रेसियल प्रोफाइलिङ) को जोखिम बढाएको उनीहरूको भनाइ छ।
विदेश मन्त्रालयका प्रवक्ता टमी पिगोटले सामाजिक सञ्जाल ‘एक्स’ मा पछिल्लो तथ्यांक सार्वजनिक गर्दै ट्रम्प प्रशासनले इतिहासकै सबैभन्दा तीव्र गतिमा सबैभन्दा बढी भिसा रद्द गरेको दाबी गरे। 'कानुन उल्लङ्घन गर्ने, ठगी गर्ने वा हाम्रो राष्ट्रिय सुरक्षामा आँच पुर्याउने भिसावाहक विदेशीहरूप्रति प्रशासनको शून्य सहनशीलता छ,' पिगोटले भने।
अधिकारकर्मीहरूले विशेष गरी गाजा क्षेत्रमा अमेरिकी सहयोगी राष्ट्र इजरायलले गरेको आक्रमणको विरोधमा प्रदर्शन गर्ने प्यालेस्टाइन समर्थक विदेशी प्रदर्शनकारीहरू र कन्जर्भेटिभ टिप्पणीकार चार्ली किर्कको हत्या सम्बन्धी सामाजिक सञ्जालमा टिप्पणी गर्ने विदेशीहरूको भिसा रद्द गरिएको विषयमा कडा आपत्ति जनाएका छन्।
विदेशी प्रदर्शनकारीहरूलाई देशनिकाला गर्ने प्रयासका अतिरिक्त ट्रम्प प्रशासनले आप्रवासी र भिसा आवेदकहरूका सामाजिक सञ्जालको निगरानी प्रक्रियालाई थप कडा बनाएको छ।
अधिकारकर्मीहरूका अनुसार सरकारले आलोचकहरूलाई निशाना बनाउन राष्ट्रिय सुरक्षाको कारण देखाएको छ भने मिनेसोतास्थित सोमाली-अमेरिकी समुदाय जस्ता आप्रवासी समुदायहरूलाई समग्र रूपमा लक्षित गर्न ठगीका केही पृथक घटनाहरूलाई अघि सारेको छ। ट्रम्पले सन् २०२४ को चुनावी अभियानमा अवैध आप्रवास रोक्ने बाचा गरेका भए पनि उनको प्रशासनले कानुनी आप्रवासलाई समेत कठिन बनाएको छ।
