: कृषि, वन तथा वातावरण मन्त्री गीता चौधरीले संयुक्त राष्ट्रसंघीय जलवायु परिवर्तनसम्बन्धी सम्मेलन (कोप–३१) का सन्दर्भमा नेपालको पोजिसन पेपर तयार भइसकेको बताएकी छन्।
सिंहदरबारमा बुधबार बसेको प्रतिनिधि सभाअन्तर्गतको हिमालमा जलवायु परिवर्तनको प्रभाव, जलवायु न्याय तथा भोटेकोशी–त्रिशूली विपद्सम्बन्धी संसदीय विशेष समितिको बैठकमा मन्त्री चौधरीले जलवायु परिवर्तनले पारेका असरसम्बन्धी विभिन्न प्रतिवेदन र सुझावहरूलाई आत्मसात् गर्दै नेपालको पोजिसन पेपर तयार गरिएको बताएकी हुन्। उनले जलवायु परिवर्तन सम्मेलनका क्रममा आएका सुझावहरूलाई समेत ध्यानमा राख्दै पोजिसन पेपरलाई अन्तिम रूप दिइने उल्लेख गरिन्।
मन्त्री चौधरीले कोप–३१ मा सहभागिताका लागि समावेशितालाई ध्यान दिइने बताइन्। कोप सम्मेलनमा भाग लिएर फर्किएपछि त्यसको समीक्षा र उपलब्धिको मापनका साथै अनुगमनमा पनि काम गरिने उनको भनाइ छ।
त्यस्तै, बैठकमा जलवायु परिवर्तन व्यवस्थापन महाशाखा प्रमुख डा. महेश्वर ढकालले ३१ औँ कोपमा सहभागी हुन ३१ वटा कार्यबुँदा समेटेर प्रारम्भिक कार्ययोजना तयार पारिए पनि भोटेकोशीको बाढी र क्षतिको घटनापछि पूर्वाधार तथा जलवायुजन्य असरका थप मुद्दाहरूलाई एजेन्डामा समावेश गरिएको बताए।
कोपका लागि नेपालको आधिकारिक कन्ट्री पोजिसन पेपर तयार भइसकेको जानकारी दिँदै उनले राष्ट्रिय जलवायु सम्मेलनमा त्यसलाई सार्वजनिक गरिने उल्लेख गरे। नेपालको पोजिसन पेपरमा अनुकूलन, प्रविधि, वित्त र क्षमता अभिवृद्धिका विषयहरू समावेश गरिएको उनले बताए।
