: प्रधानमन्त्री वालेन्द्र शाह र राष्ट्रिय स्वतन्त्र पार्टी (रास्वपा) का सभापति रवि लामिछानेबीच बूढानीलकण्ठस्थित रवि निवासमा चार घण्टा लामो राजनीतिक संवाद भएको छ।
दुई नेताबीच बिहान १० बजेदेखि दिउँसो सवा २ बजेसम्म छलफल चलेको रास्वपाका एक पदाधिकारीले पुष्टि गरेका छन्। दुई शीर्ष नेताको संवाद लम्बिएपछि बुधबारका लागि तय भएको मन्त्रिपरिषद् बैठक बिहीबारका लागि सारिएको छ। ‘सरकार सञ्चालयका केही विषय र अध्यादेशबारे साझा धारणा बनाउन भेटघाट भएको हो,’ ती पदाधिकारीले भने। निजामती अध्यादेश र नेपाल प्रहरीका महानिरीक्षक (आईजीपी) दानबहादुर कार्कीको विषयलाई लिएर छलफल केन्द्रित रहेको स्रोतको दाबी छ।
नेपाल प्रहरीको पोसाक खरिदसम्बन्धी विवादलाई लिएर सिंहदरबारमा बिहीबार संसदीय उपसमितिको बैठक बोलाइएको छ। रास्वपाले यही मुद्दालाई देखाएर आईजीपी कार्कीको राजीनामा वा बहिर्गमनका लागि दबाब दिने सम्भावना छ। प्रधानमन्त्री निकट समूहले आईजीपीलाई राजीनामा दिन दबाब बढाएको समाचार बुधबार सार्वजनिक भएको थियो।
निजामती अध्यादेश ल्याएर वा केही नेपाल ऐन संशोधन गरेर ३०–५५ लागू गर्न प्रधानमन्त्री आतुर देखिएको उच्च स्रोतको भनाइ छ। तर सभापति लामिछाने ३०–५५ लागू भए अनुभवी कर्मचारीको ठूलो समूह बाहिरिने भन्दै रोक्ने पक्षमा छन्।
दुवै पक्षले यो भेटबारे आधिकारिक जानकारी दिएका छैनन्। तर, निजामती अध्यादेश, आईजीपीको भविष्य र महत्वपूर्ण राजनीतिक नियुक्तिबारे निर्णय लिन संवाद जारी रहने बताइएको छ।
