: शरद् ऋतुमा नेपालका ४४ हिमाल आरोहण गर्न ७६ देशका १ हजार ४ सय १० आरोहीले आरोहण अनुमति लिएको पर्यटन विभागले जनाएको छ। शरद् ऋतुमा हिमाल आरोहण गर्न १ सय ६१ टोलीले अनुमति लिएका हुन्।
पर्यटन विभागका शाखा अधिकृत सुधा रेग्मीले ४४ हिमाल आरोहणका लागि १ हजार ६९ पुरुष र ३ सय ४१ महिलाले आरोहण अनुमति लिएको जानकारी दिए। आरोहण अनुमति प्रदान गरेबापत विभागले आरोहीबाट ३१ करोड ८० लाख ५० हजार ७ सय ७८ रुपैयाँ रोयल्टी संकलन गरेको छ।
आरोहण अनुमति प्रदान गरेका हिमालमध्ये सबैभन्दा धेरै मनास्लु (८,१६३ मिटर) का रहेका छन्। मनास्लु आरोहणका लागि मात्रै ४३ टोलीका ५ सय आरोहीले अनुमति लिएका छन्। जसमा ३ सय ७३ पुरुष र १ सय २७ महिला छन्। उनीहरूबाट विभागले २२ करोड ५८ लाख ५७ हजार १ सय ८९ रुपैयाँ रोयल्टी संकलन गरेको छ।
धौलागिरि–१ आरोहणका लागि ६ टोलीका ३७ जनाले आरोहण अनुमति लिएका छन्। उनीहरूबाट विभागले ८४ लाख ७३ हजार ६ सय ५० रुपैयाँ रोयल्टी संकलन गरेको छ। यस्तै, मकालु हिमाल आरोहणका लागि एउटा टोलीका तीन जनाले अनुमति लिएका छन्। उनीहरूबाट विभागले ६ लाख ८८ हजार ५० रुपैयाँ राजस्व संकलन गरेको शाखा अधिकृत रेग्मीले बताए।
यसैगरी, हिम्लुङ हिमालका लागि १२ टोलीका १ सय २१ आरोहीले अनुमति लिएका छन्। उनीहरूबाट विभागले ७४ लाख २७ हजार ७ सय २० रुपैयाँ रोयल्टी संकलन गरेको छ। यस्तै, आमादब्लम हिमाल आरोहणका लागि ३२ टोलीका ३ सय ८६ जनाले आरोहण अनुमति लिएका छन्। उनीहरूबाट विभागले ५ करोड ७६ लाख ९९ हजार ६ सय ५० रुपैयाँ राजस्व संकलन गरिएको छ।
शाखा अधिकृत रेग्मीका अनुसार पुथा हिउँचुली, डांगा हिउँचुली, बरुणत्से हिमाल, मकालु, गंगापूर्णा पश्चिम (लाङचेनेल), थोरोङ पिक, नोर्बु खाङ, अन्नपूर्ण–४, चाम्लाङ, लमजुङ हिमाल, पुमोरी, सारिबुङ, थापा पिक (धाम्पुस), पोखर खाङ, अर्दाङ, जुगल, पेरीलगायतका हिमालका लागि अनुमति प्रदान गरिएको छ।आरोहण अनुमति लिनेमा सबैभन्दा धेरै चीनका १ सय ४१ जना छन्। यसबाहेक रुसका १ सय ८, फ्रान्सका १ सय ३०, अमेरिकाका १ सय १९, बेलायतका ९६, पोल्याण्डका ४१, नेपालका ३३, स्विट्जरल्यान्डका ४७, स्पेनका ३१, भारतका ४०, इटलीका ४७ र जापानका ३५ जनाले आरोहण अनुमति लिएका शाखा अधिकृत रेग्मीले बताए।
विभागले उक्त हिमाल आरोहणका लागि जारी गरेको आरोहण अनुमतिबाट २० लाख ८९ हजार ५ सय ८४ अमेरिकी डलर अर्थात् ३१ करोड ८० लाख ५० हजार रुपैयाँ रोयल्टी संकलन गरेको छ।
