। प्रतिनिधिसभाअन्तर्गतको कानुन न्याय तथा मानव अधिकार समितिको बैठक आह्वान भएको छ । समिति सचिवालयका अनुसार आगामी मंगलबार सिंहदरबारस्थित समितिको सभाकक्षमा बैठक बस्नेछ ।
कानुन न्याय तथा मानव अधिकार समितिका सदस्यसमेत रहेका राष्ट्रिय स्वतन्त्र पार्टीका सांसद मधुकुमार चौलागाईंका अनुसार उक्त बैठकमा सर्वोच्च अदालतका विवादित न्यायाधीशबारे छलफल हुनेछ ।
‘हामीले तत्काल कानुन समितिको मिटिङ कल गरेका छौं । कानुन समितिमार्फत अहिले अनुसन्धानको घेरामा जे–जे चिजहरू आएको छ ती चीजहरूलाई हेर्ने । त्यसको अध्ययनपछि मात्रै यसलाई अगाडि बढाएर लिएर जाने हो,’ राजधानीमा भएको एक कार्यक्रममा उनले भने, ‘अहिले नै आजको आज नै महाअभियोग सिफारिस समिति गठन गर्ने र लाने भन्ने पक्षमा हामी छैनौं ।’
विवादास्पद बिचौलिया इनम सापकोटासँग सर्वोच्च अदालतका न्यायाधीशहरूको सम्बन्ध र म्यासेज आदानप्रदान भएको विषय बाहिरिएपछि सार्वजनिक रुपमै प्रश्न उठेको छ ।
इनम सापकोटाको मोबाइल तथा विद्युतीय उपकरणबाट प्रधानन्यायाधीश, न्यायाधीशहरू तथा प्रहरीका उच्च अधिकारीसँगको संवाद र कारोबारका विवरणहरू पनि सार्वजनिक भएका छन् ।
सापकोटासँग सात जना न्यायाधीशले सामूहिक भेटेको विषय पनि आएको छ ।
यस सन्दर्भमा छलफल गर्न कानुन न्याय तथा मानव अधिकार समितिको बैठक आह्वान भएको सांसद चौलागाईंले जानकारी दिएका हुन् । उनले सार्वजनिक भएका विषयउपर विस्तृत अध्ययन आवश्यक रहेको बताएका छन् ।
‘कसैले घुस लेनदेन गर्ने कुरा ट्याक्स कट्टा गर्न गर्छ होला र ! त्यहाँ त ट्याक्सको कुरा पनि छ । सबभन्दा गम्भीर विषय के छ भने यो अनुसन्धानको घेरामा भएको विषय बाहिर कसरी आयो ?’ उनको प्रश्न छ ।
