: नेपाल प्रिमियर लिग(एनपीएल) तेस्रो संस्करणको आठौं खेलमा सुदूरपश्चिम रोयल्स विराटनगर किंग्ससँग ३५ रनले पराजित भएको छ।
किर्तिपुरस्थित त्रिवी क्रिकेट स्टेडियममा निकै ढिलो गरि सुरु भएको खेलमा टस हारेर ब्याटिङ गरेको विराटनगर किंग्सले निर्धारित ५ ओभरमा १०५ रन बनाएको थियो।
विराटनगरले दिएको १०६ रनको विजयी लक्ष्य पछ्याएको सुदूरपश्चिम रोयल्सले निर्धारित ५ ओभरमा ३ विकेट गुमाउँदै ७० रन मात्रै जोड्न सक्यो। सुदूरपश्चिम रोयल्सको लागि स्कट केग्गुलिनले सर्वाधिक २८ रन बनाउँदै अविजित रहे।
उनले ६ बलमा १ चौका र ४ छक्का प्रहार गरे। आन्द्रे रसेलले पहिलो बलमा नै विकेट लिए। सेर्फान रुथरफोर्ड आन्द्रे रसेलको बलमा गोल्डेन डक भएका हुन्। दोस्रो विकेटको रुपमा कप्तान दिपेन्द्र सिंह ऐरी १ रनमा क्याच भए।
तेस्रो विकेट ओपनर सैफ जैबको विकेट गयो। सैफ जैबले सर्वाधिक १७ रन बनाए। उनले १० बलमा २ चौका प्रहार गरे। आरिफ शेख १७ रनमा अविजित रहे। विराटनगर किंग्सका लागि बलिङतर्फ आन्द्रे रसेल, एन्जेलो म्याथ्यूस र रुपेश सिंहले १–१ विकेट लिए।
त्यसअघि, ब्याटिङ गरेको विराटनगर किंग्सको लागि ओपनर सेहान जयसुरियाले सर्वाधिक ३९ रन बनाए। उनले ११ बलमा २ चौका र ५ छक्कासहित ३९ रन बनाए। पहिलो ओभरमा सेहान जयसुरियामा ५ छक्का प्रहार गरे। पहिलो ओभरमा सुदूरपश्चिम रोयल्सका बलर पहिलो ओभरमा ३५ रन खर्चिए। १.२ ओभरमा विराटनगर किंग्सले ५२ रन बनाएको थियो।
१.५ ओभरको पावरप्ले रह्यो। पावरप्लेमा विराटनगर किंग्सले बीना कुनै विकेटको क्षती ५३ रन बनाएको थियो। २ ओभरमा बिना कुनै विकेट ६० रन बनाएको थियो। विराटनगरले पहिलो विकेटको रुपमा सेहान जयसुरियाको विकेट गुमायो। पहिलो विकेटको लािग सेहान र लोकेशले ६८ रनको साझेदारी बनाएका थिए । लोकेश बम अन्तिम बलमा २५ रन बनाउँदै क्याच भए।
आन्द्रे रसेल २९ रनमा अविजित रहे। सुदूरपश्चिम रोयल्सका लागि दुवै विकेट अभिनाश बोहोराले लिए। सुदूरपश्चिम रोयल्स र विराटनगर किंग्स दुवैको यो तेस्रो खेल थियो। सुदूरपश्चिम रोयल्सले पहिलो खेलमा लुम्बिनी लायन्ससँग ७ विकेटको हार बेहोरेको थियो। दोस्रो खेलमा सुदूरपश्चिम रोयल्सले पोखरा एभेन्जर्सलाई ६ विकेटले हराएकोे थियो। विराटनगर किंग्सले भने यसअघिको दुवै खेल हारेको थियो।
पहिलो खेलमा चितवन राइनोजसँग ८ रनले हारेको विराटनगर दोस्रो खेलमा कर्णाली याक्ससँग ४ विकेटले पराजित भएको हो। आजको पहिलो खेलमा लुम्बिनी लायन्स र चितवन राइनोजले वर्षाको कारण १-१ अंक बाँडेका हुन्। आइतबार एक खेल मात्रै रहेको छ। आइतबार जनकपुर बोल्ट्स र पोखरा एभेन्जर्सको खेल रहेको छ।
