: नेपाली कांग्रेसले १५औँ महाधिवेशनबाट निर्वाचित कार्यसमितिको विवरण अध्यावधिकका लागि निर्वाचन आयोगमा पेस गरेको छ।
सोमबार महामन्त्री प्रदीप पौडेल नेतृत्वको टोलीले निर्वाचन आयोगमा पुगेर प्रमुख निर्वाचन आयुक्त मानबहादुर कार्कीको उपस्थितिमा आयोगका सचिव कृष्णप्रसाद काप्रीलाई राजनीतिक दलसम्बन्धी ऐनको दफा ५१ अनुसार केन्द्रीय कार्यसमितिको अध्यावधिक विवरण बुझाएको हो। महामन्त्री पौडेलले कांग्रेसको विधान संशोधनसम्बन्धी विवरण, महाधिवेशनबाट पारित राजनीतिक दस्तावेज, समसामयिक राजनीतिक दस्तावेज र महाधिवेशनका निर्णयहरू बुझाएका थिए।
आयोगमा अध्यावधिक विवरण बुझाएपछि महामन्त्री पौडेलले पुरानो केन्द्रीय कार्यसमिति परिवर्तन भइसकेकाले पार्टीको विधान र दफा ५१ को व्यवस्थाअनुसार नयाँ निर्वाचित कार्यसमितिलाई निर्वाचन आयोगमा अध्यावधिक गराइएको जानकारी दिए। उनले कांग्रेसलाई समेत जोडेर हाल उठाइएका विभिन्न विषयहरू र सरकारसँग जोडिएका प्रश्नहरूलाई गहिराइमा पुगेर छानबिन गर्नुपर्ने र सत्यतथ्य बाहिर ल्याउनुपर्ने बताए।
उनले कांग्रेसले सधैँ लोकतन्त्रको रक्षा गर्दै आएको र विधि, संस्थागत पद्धति तथा कानुनी शासनको पालना गर्ने पार्टी भएको धारणा राखे। सरकार ढाल्ने वा निर्वाचित सरकारलाई असहयोग गर्ने उद्देश्य नरहेको स्पष्ट पार्दै उनले राम्रा कामलाई समर्थन गर्ने र गलत विषयमा प्रश्न उठाउने नीति लिइएको बताए।
