: सडकको खाल्डाखुल्डीका कारण मोरङको सुनवर्षीमा भएको सवारी दुर्घटनामा परेर एक जनाको मृत्यु भएको छ ।
सोमबार साँझ सुनवर्षी नगरपालिका–६ कुडेलीस्थित भित्री सडकमा मोटरसाइकल र साइकल ठोक्किँदा मोटरसाइकल चालक ५० वर्षीय इन्द्रलाल साहको मृत्यु भएको प्रहरीले जनाएको छ ।
प्रहरीका अनुसार चैताबाट कुडेलीतर्फ आउँदै गरेको को ३६ प ९४५८ नम्बरको मोटरसाइकल विपरीत दिशाबाट आइरहेको साइकलसँग ठोक्किएको थियो । दुर्घटनामा मोटरसाइकल चालक साह गम्भीर घाइते भए । उनलाई उपचारका लागि रंगेली अस्पताल पुर्याइए पनि चिकित्सकले साँझ ७ बजे मृत घोषणा गरेको प्रहरीले जनाएको छ ।
दुर्घटनामा साइकलयात्री सुनवर्षी–६ का ५० वर्षीय भीम माझी घाइते भएका छन् । उनको अवस्था सामान्य रहेको प्रहरीले जनाएको छ । प्रहरीको प्रारम्भिक अनुसन्धानबाट सडकमा रहेका खाल्डाखुल्डीका कारण दुर्घटना भएको पत्ता लागेको छ । प्रहरीका अनुसार दुवै सवारीसाधन नियन्त्रणमा लिएर घटनाको थप अनुसन्धान अघि बढाइएको छ ।
