: प्रधानमन्त्री बालेन्द्र शाह र सत्तारुढ दल राष्ट्रिय स्वतन्त्र पार्टीका सभापति रवि लामिछानेलाई भेटेर भारतीय विदेश सचिव विक्रम मिश्री स्वदेश फर्किएका छन्।
प्रधानमन्त्री शाहलाई औपचारिकरूपमा भारत भ्रमणको निम्तो दिन दुई दिनका लागि काठमाडौं आएका मिश्रीले उच्च स्तरीय राजनीतिक भेटघाट गरे।
बिहीबार सिंहदरवारस्थित प्रधानमन्त्री कार्यालयमा उनले प्रधानमन्त्री शाहसँग भारत भ्रमण र त्यसक्रममा उठाउनुपर्ने एजेण्डाका विषयमा छलफल गरेका थिए। उनीहरूबीच भारत भ्रमणको मितिबारे पनि छलफल भएको स्रोतको दाबी छ।
तर, दुवै पक्ष बसेर मोटामोटी मिति टुंग्याए पनि यस विषयमा औपचारिक रूपमा दुवै पक्षले बताएको छैन। मिश्री भारत पुगेपछि त्यहाँका अधिकारीहरूसँग छलफल गरेपछि मिति सार्वजनिक हुने स्रोतले दाबी गरेको छ।
प्रधानमन्त्रीसँग भेटेलगत्तै विदेश सचिव मिश्री रास्वपा सभापति लामिछानेलाई भेट्न उनको निवास पुगेका थिए। उनीहरूबीच नेपाल र भारतको द्विपक्षीय हितका विषयमा छलफल भएको थियो। 'उहाँहरूबीच दुई देशबीचको द्विपक्षीय हितका विषयमा छलफल भयो,' रास्वपा एक पदाधिकारीले अन्नपूर्णसँग भने।
त्यस्तै भारतीय विदेश सचिव मिश्रीले नेपाली कांग्रेस एक शीर्ष तहका नेतासँग समेत 'गोप्य' भेटघाट गरेको स्रोतले बताएको छ। यद्यपि, उक्त विषय दुवै पक्षले सार्वजनिक गरेको छैन। कांग्रेसका एक नेताले उक्त भेटघाट बारे पुष्टि गरे पनि नाम भने बताउन चाहेनन्।
बुधबार दुई दिने नेपाल भ्रमणमा आएका मिश्रीले अर्थमन्त्री स्वर्णिम वाग्ले, परराष्ट्रमन्त्री शिशिर खनाल, पूर्वाधार मन्त्री सुनिल लम्साल र ऊर्जामन्त्री विराजभक्त श्रेष्ठसँग भेट गरेका थिए। भेटमा नेपाल र भारतबीचको सम्बन्धलाई सुदृढ बनाउने र आपसी हितका विषयमा छलफल भएको मन्त्रीका सचिवालयहरूले जनाएका छन्।
त्यस्तै विदेश सचिव मिश्रीले परराष्ट्र मन्त्रालयका सचिव अमृतबहादुर राईसँग द्विपक्षीय वार्ता गरेका थिए। परराष्ट्र मन्त्रालयका अनुसार दुई पक्षबीच नेपाल र भारतका विभिन्न पक्षबारे बृहत् छलफल भएको थियो।
