: सुर्खेतमा जुवातास खेलिरहेको अवस्थामा प्रहरीले १७ जनालाई पक्राउ गरेको छ। वीरेन्द्रनगर नगरपालिका–४, जिरो ड्यामस्थित एक घरमा छापा मारेर प्रहरीले उनीहरूलाई पक्राउ गरेको हो।
जिल्ला प्रहरी कार्यालय सुर्खेतका अनुसार शुक्रबार राति करिब ११ः५० बजे प्रशान्त शाहीको घरमा जुवातास खेलिरहेको गोप्य सूचना प्राप्त भएपछि संयुक्त प्रहरी टोली परिचालन गरिएको थियो। कर्णाली प्रदेश प्रहरी कार्यालय, जिल्ला प्रहरी कार्यालय सुर्खेत र कर्णाली प्रदेश प्रहरी गणबाट खटिएको ४५ जना प्रहरीको टोलीले घरमा खानतलासी गर्दा जुवातास खेलिरहेका १७ जनालाई नियन्त्रणमा लिएको हो।
प्रहरीले घटनास्थलबाट २८ बुक तास, लङ्गुरबुर्जा खेल्न प्रयोग गरिने ६ वटा गोटी र नगद १ लाख ५ हजार ६ सय ७० रुपैयाँ बरामद गरेको जनाएको छ। बरामद तासमध्ये २४ बुक नखुलेको र चार बुक खुलेको अवस्थामा फेला परेको प्रहरीले जनाएको छ।
पक्राउ पर्नेमा अछामको तुर्माखाँद गाउँपालिका–१ का पवन रावल, टोपेन्द्र थापा र कुलबहादुर रावल, बर्दियाको बारबर्दिया नगरपालिका–६ का ३२ वर्षीय नरेश लामिछाने, दैलेखको चामुण्डा बिन्द्रासैनी नगरपालिका–९ का रामबहादुर साउद र ४८ वर्षीय पदम सार्की, वडा नम्बर ४ का ज्ञानेन्द्र शाही तथा वडा नम्बर ७ का दीपेन्द्र शाही रहेका छन्।
त्यस्तै, सुर्खेतको वीरेन्द्रनगर नगरपालिका–५ का कुलबहादुर सुनार, वडा नम्बर ३ का लक्ष्मी शाही र उपेन्द्र बोहोरा तथा दैलेखको ठाटीकाँध गाउँपालिका–५ का हिमाल शाही, राजकुमार शाही, प्रकाश शाही, पर्ज कठायत र भरत शाही पक्राउ परेका छन्। प्रहरीका अनुसार पक्राउ परेका सबैलाई बिहान २ः३० बजे जिल्ला प्रहरी कार्यालय सुर्खेतमा ल्याइएको थियो। घटनास्थलबाट बरामद सामग्रीसहित पक्राउ परेका व्यक्तिमाथि जुवाताससम्बन्धी कसुरमा थप अनुसन्धान भइरहेको जिल्ला प्रहरी कार्यालय सुर्खेतले जनाएको छ।
प्रदेश प्रहरी प्रमूख डिआईजी जयराज सापकोटाले चाडपर्वलाई लक्षित गरी प्रदेशभरी उल्लेख्य रुपमा प्रहरी परिचालन गरिएको बताए। उनले जुवातास अगायतका अपराधिक क्रियाकलापमा प्रहरीले कडाईका साथ निगरानी बढाएको बताए। उनका अनुसार चाडपर्व तथा अन्य समयमा जुवातासका गतिविधि बढ्न सक्ने भन्दै प्रहरीले यस्ता गैरकानुनी गतिविधिविरुद्ध निगरानी र कारबाहीलाई तीव्रता दिएको छ।
