: जेब्रा क्रसिङमै सवारीसाधन पार्किङ गरेर ट्राफिक नियम उल्लङ्घन गर्ने धादिङ क्षेत्र नम्बर २ का प्रतिनिधिसभा सदस्य बोध नारायण श्रेष्ठको सवारीसाधनलाई ट्राफिक प्रहरीले जरिवाना गरेको छ। सांसद श्रेष्ठले प्रयोग गर्ने बागमती प्रदेश ०१–०२७ विएवि १३९३ नम्बरको सवारीसाधन धादिङबेसीको बीचबजार चोकस्थित जेब्रा क्रसिङमा पार्किङ गरिएको तस्बिरसहितको समाचार सार्वजनिक भएपछि ट्राफिक प्रहरीले कारबाही प्रक्रिया अघि बढाएको हो।
जिल्ला ट्राफिक प्रहरी कार्यालय गजुरीका प्रमुख शिशिर थापाका अनुसार ट्राफिक नियम उल्लङ्घन गरेबापत अनलाइन प्रणालीमार्फत जरिवाना निर्धारण गरिएको छ। नियम उल्लङ्घनको प्रकृति हेरी प्रणालीले ५०० देखि १ हजार ५०० रुपैयाँसम्म जरिवाना निर्धारण गर्न सक्ने उनले बताए। ‘अनलाइन प्रणालीमा जति जरिवाना देखिन्छ, त्यति नै भुक्तानी गर्नुपर्छ। भुक्तानी गर्ने क्रममा सिस्टमले नै रकम निर्धारण गर्छ,’ थापाले भने। सञ्चारमाध्यममा समाचार सार्वजनिक भएपछि गजुरीबाट जरिवानाको प्रक्रिया अघि बढाइएको पनि उनले जानकारी दिए।
मंगलबार बिहान झिगु नेवाः समाज धादिङले आयोजना गरेको नेपाल संवत् तथा दीपावलीको शुभकामना आदानप्रदान कार्यक्रममा सहभागी हुन सांसद श्रेष्ठ धादिङ आएका थिए। सोही क्रममा उनका चालकले धादिङबेसीको बीचबजार चोकमा रहेको जेब्रा क्रसिङमै सवारीसाधन पार्किङ गरेका थिए।
घटनापछि सांसद श्रेष्ठले जेब्रा क्रसिङमा पार्किङ गरेर ट्राफिक नियम उल्लङ्घन भएको स्वीकार गर्दै सामाजिक सञ्जालमार्फत गल्ती स्वीकार गरेका छन्।‘गलत गलत नै हो, चाहे सचिवालयबाट होस् वा माननीयबाट। गल्ती स्वीकार्नु र त्यसबाट पाठ सिक्नु पनि एक असल नागरिकको पहिचान हो,’ उनले लेखेका छन्।
श्रेष्ठ राष्ट्रिय स्वतन्त्र पार्टी (रास्वपा)बाट निर्वाचित धादिङ क्षेत्र नम्बर २ का प्रतिनिधिसभा सदस्य हुन्
